Дэлхийн II дайн дууссаны 80 жилийн ойд зориулсан цэргийн парад өнөөдөр Хятадын нийслэл Бээжин хотын Тяньаньминий талбайд боллоо. Жагсаалд Хятадын Ардын Чөлөөлөх армийн 10 мянган цэрэг, 100 нисэх онгоц, хэдэн зуун зэвсэг, техник тоног төхөөрөмж оролцсон байна.
Парадын хамгийн чухал хэсгийн нэг нь зэвсэглэл байлаа. Батлан хамгаалахын шинжээч Александр Нейллийн хэлснээр парадын үеэр богино болон дунд зайн баллистик пуужингууд, олон удаагийн залпын пуужингийн систем, нисгэгчгүй байлдааны нисэх төхөөрөмж буюу стелс дронуудыг харууллаа. Мөн дуунаас хурдан гүйдэлтэй төхөөрөмж, YJ-21 усан онгоцны эсрэг далавчит пуужин, JL-3 шумбагчаас харвах баллистик пуужин зэргийг харуулсан байна.
Ши Жиньпиний засаглалын жилүүдэд Хятад улс урьд өмнө байгаагүй цэргийн шинэчлэл хийж, Азидаа тэргүүлэхийн сацуу зарим ангилал нь АНУ-ын цэргийн хүчнээс давж гарч байгааг шинжээчид хэлдэг.
Цэргийн парадын үеэр олон нийтэд харуулсан зэвсэг, тоног төхөөрөмжүүдээс танилцуулж байна.
Парад эхлэхэд Хятадын хамгийн сүүлийн үеийн J-35 стелс сөнөөгч, хоёр хөдөлгүүртэй загварууд, мөн H-6 бөмбөгдөгч онгоцууд хөөрч буйг харууллаа. Парадын үеэр 100 гаруй нисэх онгоц агаарт үзүүлбэр үзүүлсэн байна.
Шинэ тив хоорондын цөмийн пуужин "DF-5C"-г танилцууллаа
Цэргийн парадын үеэр Хятадын Дунфэн-5 (DF-5C) тив хоорондын цөмийн баллистик пуужингийн шинэ хувилбарыг ил болголоо. Шинжээч Нейллийн хэлснээр энэ пуужин өмнөхөөсөө илүү холын тусгалтай бөгөөд нэг пуужинд 12 хүртэл цөмийн цэнэгт хошуу тээвэрлэх боломжтой аж. DF-5C нь хоёр шатлалт, шингэн түлштэй бөгөөд газрын гүн дэх тусгай байгууламжаас хөөрдөг, стратегийн сөргүүлэлтийн зориулалттай гэгддэг.
Шинжээчид DF-5C нь АНУ-ын эх газрыг онилох чадвартай гэж дүгнэв. Тухайлбал, Дунфэн-5 цөмийн пуужин нь Хятадын хойд бүсийн газар доорх байгууламжаас хөөрөх зориулалттай бөгөөд АНУ-ын эх газрыг чиглэн цохилт өгөх чадвартай гэж шинжээч Александр Нейлл BBC-д ярьсан байна.
Шинэ хөдөлгөөнт пуужин "DF-61"
Хятад улс сүүлийн жилүүдэд шинээр боловсруулсан тив алгасагч баллистик пуужингаа танилцуулсан бөгөөд DF-61 хэмээн нэрлэжээ.
Шинжээчид Дунфэн-61 пуужинг дуунаас хурдан, зам дээр байршуулж болдог босоо хөөргөх төхөөрөмжтэй пуужин гэдгээрээ онцлог бөгөөд “олох, устгахад илүү хэцүү” гэж тайлбарлажээ.
Мөн LY-1 нэртэй шинэ лазер зэвсгийг танилцууллаа. Энэ нь найман дугуйт HZ-155 хуягт машин дээр суурилагдсан байсан бөгөөд цахилгаан төхөөрөмжийг гэмтээх, шатаах, бүр нисгэгчийг сохлох чадвартай хүчирхэг зэвсэг гэж Нейлл тодорхойлов.
Аварга шумбагч дрон AJX002
XLUUV нэртэй асар том нисгэгчгүй усан доорх төхөөрөмжүүд олон нийтийн өмнө гарлаа. Эдгээр шумбагч төрлийн дронууд 18–20 метрийн гүнд ажиллаж, дайсны хөлөг онгоц, шумбагч онгоцны эсрэг ажиллагааны үеэр тагнуулын үүрэг гүйцэтгэх чадвартай аж.
Судлаач Саттон өнөөдөр парадын үеэр гарсан хоёр дроныг гурван жилийн туршилтын хөтөлбөрийн шалгарсан шинэ загварууд байх магадлалтай гэжээ.
Эхний дрон AJX002-ын урт нь 18–20 метр, голч нь 1–1.5 метр. Хоёр дахь нь уртаараа ижил боловч илүү өргөн, 2–3 метрийн голчтой аж.
Цөмийн зэвсэг тээх чадвартай YJ-17
“YJ” нэршлийг Хятад улс уламжлал ёсоороо хөлөг онгоцны эсрэг пуужинд ашигладаг. Иймээс YJ-17 нь дунд тусгалтай DF-17 пуужингийн шинэ хувилбар гэж шинжээчид үзэж байна. DF-17 нь хуурай замын хөдөлгөөнт тавцангаас харвадаг байсан бол YJ-17 нь усан онгоцны босоо харвагч төхөөрөмжөөс ашиглагдах зориулалттай гэж таамаглаж байна.
“Робот нохой” дрон болон бусад төхөөрөмжүүд
Парадын үеэр танилцуулсан зэвсгийн төхөөрөмжүүдийн дунд өндөрт байгаа байг устгах чадвартай HQ-29 газар-агаарын пуужингийн систем, усан доорх төхөөрөмжүүд, төрөл бүрийн дрон технологи орж байлаа. Дрон технологийн хувьд танкны дээрээс ажиллах дрон хөөргөх тавцан, дрон сүргийг устгах зориулалттай систем, автоматжсан буюу өөрөө ажилладаг дронууд, мөн “робот нохой” хэлбэртэй дронуудыг үзүүлсэн нь Хятад улс уламжлалт зэвсгээс гадна дэвшилтэт дрон, робот, хиймэл оюунд суурилсан шинэ төрлийн зэвсэглэл хөгжүүлж байгааг харуулж байна.
