Японы Ерөнхий сайд Шигэрү Ишиба болон Өмнөд Солонгосын Ерөнхийлөгч И Жэ Мён нар хүн амын төрөлтийн хямрал зэрэг хоёр орны нийтлэг тулгамдсан асуудлыг шийдэх зорилгоор хамтарсан ажлын хэсэг байгуулахаар тохиролцжээ.
Дэлхийн улс орнуудын тал илүү нь хүн амын төрөлтийн түвшнээр (эмэгтэй бүрт дунджаар 2.1 төрөлт) доогуур үзүүлэлттэй болжээ. Амьжиргааны зардлын өсөлт, залуу үеийн нийгмийн хандлагын өөрчлөлт зэрэг олон шалтгаан төрөлт буурахад нөлөөлж байна.
Өмнөд Солонгос (0.75), Япон (1.15) хамгийн бага төрөлттэй орны тоонд багтаж, хүн амын 20-оос дээш хувь нь 65-аас дээш настай “супер хөгшин нийгэм”-д тооцогддог болоод байна. Сүүлийн жилүүдэд аль аль нь энэ чиг хандлагыг өөрчлөхөөр хэдэн тэрбумаар хөрөнгө оруулсан боловч хүн амын бууралт нь нийгмийн хамгааллын тогтолцоонд дарамт болж, эдийн засгийн өсөлтийг сааруулах эрсдэлтэй хэвээр байна.
И Жэ Мён бямба гарагт Токиод болсон уулзалтын дараа хийсэн хэвлэлийн бага хурал дээр “хамтын зөвлөлдөх байгууллага” байгуулах санаачилгаа танилцуулж, хөгшрөлт, төрөлт, гамшгийн бэлэн байдал, хөдөө аж ахуй, хөдөөгийн сэргэлт зэрэг нийтлэг сорилтыг хамтдаа шийдвэрлэхийн чухлыг онцоллоо.
“Хоёр улс эдгээр салбарт хамтарсан арга хэмжээ авах шаардлагатайг хүлээн зөвшөөрч, шинэ механизмын хүрээнд хамтдаа шийдэл хайх болно” гэж тэрбээр Korea Times сонинд ярьжээ.
Мөн тэд хиймэл оюун ухаан, устөрөгчийн эрчим хүч зэрэг ирээдүйн технологийн чиглэлээр хамтын ажиллагаагаа бэхжүүлэхээр тохиролцсон байна. Түүнчлэн 18–25 насны япон, солонгос иргэд ажлын амралтын визийн хөтөлбөрт хоёр удаа оролцох боломжтой болж, хүн хоорондын харилцааг өргөжүүлэхээр болжээ.
“Манай хоёр улсын хооронд олон нийтлэг асуудал бий. Бид ухаанаа хуваалцаж, шийдэл олохын тулд зөвлөлдөх байгууллага байгуулахаар тохирлоо” гэж Ишиба ярьжээ. Хоёр удирдагч мөн Солонгосын хойгийн цөмийн зэвсгээс ангижруулах, тогтвортой байдлыг хангахад тууштай ажиллахаа баталгаажууллаа.
И Жэ Мёны төрийн айлчлал түүхэн ач холбогдолтой байлаа. Учир нь Өмнөд Солонгосын удирдагч анх удаа батлан хамгаалах гол холбоотон АНУ-ыг бус, харин Японыганхны гадаад айлчлалынхаа чиглэл болгожээ. Өмнөд Солонгос, Японы харилцаа олонтаа хурцадмал байсаар ирсэн бөгөөд энэ нь арлын маргаан, худалдааны маргаан, дайны үеийн бэлгийн боолчлол зэрэг түүхэн асуудлуудтай холбоотой.
2023 оноос хойш хоёр улс АНУ-тай хамт Хойд Солонгосын цөмийн зэвсэг, баллистик пуужингийн хөтөлбөрийн эсрэг гурван талын аюулгүй байдлын хамтын ажиллагаагаа эрчимжүүлж байна.
