Ардчилсан намын Үндэсний бодлогын хороо өнөөдөр хуралдаж, Их хурлаа товлох төлөвтэй байна. Гишүүддээ тараасан зараар АН-ын Үндэсний бодлогын хорооны хурал 12.30 эхлэхээр мэдээлсэн байна. Үндэсний бодлогын хорооны хурлаар намын Их хурлаа зарлахаас гадна эхлээд үндсэн дүрмээ өөрчлөх үү, эсвэл дараагийн даргаа сонгох асуудлыг хэлэлцэх үү гэдгийг шийдэх хүлээлттэй байна.

АН-ын нэр бүхий гишүүдээс Их хурлаараа эхлээд үндсэн дүрмийн өөрчлөлтөө хэлэлцэн баталсны дараа намын даргыг шинээр сонгох асуудлыг хэлэлцэхийг шаардсан. Ардчилсан намын дарга Л.Гантөмөрийн хувьд Их хуралд ажлаа тайлагнасны дараа албан ёсоор ажлаа өгөхөө мэдэгдсэн. Одоогоор УИХ-ын гишүүн Ж.Баярмаа, Б.Мөнхбаясгалан тэргүүтэй гишүүд АН-ын даргад өрсөлдөхөө мэдэгдээд байна.