Шинээр баригдсан сургууль цэцэрлэгүүдэд тохижилт хийгдээгүйн улмаас олон мянган сурагч шинэ сургуульдаа хичээллэх боломжгүй болсон юм. Энэ асуудлын тухайд УИХ-ын гишүүн П.Сайнзориг "тэвчээртэй харзнаж хүлээсэн ч бичиж хэлэхээс өөр арга алга" хэмээн өнөөдөр цахим хуудастаа ийнхүү нийтэлжээ.

Тэрээр "2025-2026 оны хичээлийн жилд нийслэл Улаанбаатар хотод 668 цэцэрлэг буюу төрийн өмчийн 325, төрийн бус өмчийн 343 цэцэрлэгт 16,053 багш, ажилтан ажиллах бөгөөд 2-5 насны 125,685 хүүхэд цэцэрлэгт хамрагдахаар байна. Харин 326 ерөнхий боловсролын сургууль буюу төрийн өмчийн 171, төрийн бус 155 сургуульд 25,100 багш ажилтан ажиллах бөгөөд 412,273 сурагч суралцана. Шинээр ч сургууль, цэцэрлэг нэлээд баригдсан байна. Миний бие ч нийслэлийн Засаг даргын орлогчоор ажиллаж байхдаа “хэрүүл, тэмцэл” болон байж сургууль, цэцэрлэггүй хороодод 10 байршил сургууль, цэцэрлэг барих газрын асуудлыг хувийн хэвшилтэй тохиролцож авахад оролцож явсан байдаг. Түрүүчээсээ баригдаж, ашиглатад орж байна.

Гэтэл шинээр баригдсан 17 сургууль, 20 цэцэрлэгийн барилга нь ашиглатад орсон ч сандал, ширээ, тоног төхөөрөмжгүйн улмаас есдүгээр сарын 01-ний өдөр 17,235 сурагч, 4870 хүүхэд сургууль, цэцэрлэгтээ явах боломжгүй байна. СХД-т 3 сургууль буюу 62 дугаар сургуулийн өргөтгөл, 150 дугаар сургууль, 171 дүгээр сургууль, Баянгол дүүрэгт 3, Баянзүрх дүүрэгт 3, Хан-Уул дүүрэгт 2, Сүхбаатар дүүрэгт 1 гэх мэтээр 12 сургууль, 19 цэцэрлэг, 12-р Бага сургууль, цэцэрлэгийн цогцолбор тоног, төхөөрөмж, хүүхдийн ширээ, сандалгүй байна. Гомдмоор юм бэ.