УИХ-ын Төсвийн байнгын хорооны дарга Х.Ганхуяг татварын багц хуулийн шинэчлэлийн талаар мэдээлэл өгсөн билээ. Тэрээр шинэчлэлийн гол зорилго нь иргэдийн татварын ачааллыг бууруулж, шударга тогтолцоог бүрдүүлэхэд чиглэж байгааг онцлов. Ингэснээр хүн бүр татварын хөнгөлөлт, буцаан олголтоо авах боломжтой, ил тод системд шилжих юм. Татварын хуулийн төслүүдэд орж байгаа өөрчлөлтийг тоймолж байна.
Нэмэгдсэн өртгийн албан татвар
500 мянган төгрөг хүртэлх худалдан авалтад төлсөн татварыг бүрэн буцааж, 500 мянгааас 800 мянган төгрөгийн хоорондох худалдан авалтад 50 хувийн буцаалт олгоно. 800 мянган төгрөгөөс дээш худалдан авалтад 20 хувийн буцаалт хийнэ. Мөн НӨАТ-ын босгыг 400 сая төгрөг болгон нэмэгдүүлж, хялбаршуулсан бүртгэлийн горим нэвтрүүлэхийн зэрэгцээ цахим үйлчилгээ болон гадаадын онлайн дэлгүүрийн бараанд НӨАТ ногдуулахаар тусгасан байна.
Хувь хүний орлогын албан татвар
Сарын 800 мянган төгрөг буюу жилийн 9.6 сая төгрөг хүртэл орлоготой иргэд ХХОАТ-аас бүрэн чөлөөлөгдөнө. Энэ нь нийт ажиллах хүчний гуравны нэгд хамаарч байгаа өөрчлөлт аж. Жишээлбэл, өнөөгийн тогтолцоонд 800 мянган төгрөгийн цалинтай иргэн цалингийнхаа 13 хувийг татварт төлдөг бол шинэчлэлийн дараа ердөө 0.8 хувь төлөхөөр буурна. Дундаж буюу 1.5 сая төгрөгийн цалинтай хүний татварын хэмжээ хоёр дахин багасаж, 3.5 сая төгрөгийн цалинтай иргэний татвар 14 хувиас 9.5 хувь болж буурна. Харин жилийн 360 сая төгрөгөөс дээш орлоготой иргэдэд 20 хувийн татвар ногдуулах шинэ зохицуулалт орж ирж байна.
Аж ахуйн нэгжийн орлогын албан татвар
Зургаан тэрбум төгрөг хүртэл ашигтай компани 10 хувь, 10 тэрбумаас дээш ашигтай компани 25 хувь татвар төлнө. Ашгаа зориуд задалж, охин компани байгуулан татвараас зайлсхийхийг зогсоохын тулд 6-10 тэрбум төгрөгийн ашигт 15 хувийн татварын шинэ шатлал бий болгохоор тусгажээ.
Үүнээс гадна иргэд татварын тайлангаа дөрвөн жилийн дотор засах боломжтой болох бөгөөд татвар төлөх хугацааг 1-2 сараар сунгах зохицуулалт орж байна. Хувиараа бизнес эрхлэгчдийн тайланг систем автоматаар боловсруулж татвар ногдуулдаг болж, орлогыг бүрэн тодорхойлох боломж бүрдэнэ. Мөн эрчим хүчний хэмнэлттэй ногоон орон сууц болон анхны орон сууц худалдан авахад олгодог татварын хөнгөлөлтийг өмнөх 6 сая төгрөгөөс 15 сая төгрөг болгон нэмэгдүүлэхээр болсон байна. Энэхүү багц хуулийн төслийг ирэх сарын 15-наас УИХ-аар хэлэлцэж эхлэхээр төлөвлөжээ.
