Л.Оюун-Эрдэнийн Засгийн газарт Элчин зөвлөхөөр ажиллаж байсан Н.Энхбаярын саяхан хэвлэлд өгсөн ярилцлага нийгмийн сүлжээнд оны анхаарал татаад байна. Тэрээр “Л.Оюун-Эрдэнэ Оюу толгой, Ухаа худагтай адилхан том луйвар хийсэн” гэж ярьжээ. Энэхүү бичлэг гэнэт нийгмийн сүлжээнд тархаж байгааг харвал, Их хурлаа угтсан МАН доторх улс төрийн зодооны эхлэл ч байх магадлалтай. Гэсэн хэдий ч Ерөнхийлөгч асан Н.Энхбаярын ярианд нэлээд ноцтой мэдээлэл дурдагдаж байгаа учраас сийрүүлье.
Ерөнхийлөгч асан Н.Энхбаяр хэвлэл ярихдаа “Л.Оюун-Эрдэнийн Засгийн газрын үед ямар муухай шийдвэр гарсан. Урагшаа нүүрс зөөж байгаа төмөр монгол, хятадын талаас тавигдсан. Гэхдээ хоорондоо 25 км зөрсөн байгаа. Энэ төмөр замыг нийлүүлэхийн тулд 16 жилийн турш жил бүр 20 сая тонн өндөр чанарын коксжих нүүрсийг "Чайна Энержи"-д төлбөр маягаар нийлүүлж, 25 км замыг босгоно гэж байгаа. Ямартай ч 25 км төмөр зам босгох гэж байгаа нь зөв юм байж. Гэхдээ 16 жилийн турш жил бүр 20 сая тонн нүүрс нийлүүлнэ гэдэг нь нийт 320 сая тонн нүүрс болно гэсэн үг. Өөрөөр хэлбэл, 320 сая тонн сайн чанарын нүүрсийг нийлүүлж байж 25 км төмөр зам босгоно. Өнөөдрийн ханшаар нэг тонн нүүрсийг 70 ам.доллар гэж тооцвол 320 сая тонн нүүрс 24 тэрбум ам.доллар болно. Тэгэхээр 24 тэрбум ам.доллараар 25 км төмөр зам тавих юм байна. Энэ чинь луйвар. Маш сэжигтэй, ингэж болохгүй.
Газар дээр тавьж байгаа хамгийн үнэтэй төмөр зам 10 сая буюу 25 км төмөр зам чинь 250 сая ам.доллар болно. Гэтэл 24 тэрбум ам.доллараар яригдаж байна. Нөгөө ухаа худаг, Оюу толгойтой адилхан том луйвар хийж байна. Цаадах 23 тэрбум ам.долларыг хэн авах гээд байна. Хятадын компани бол биш байх, зүгээр Хятадын компанийн нэрийг ашиглаж байгаа байх. Хэн нэгний ашиг сонирхлоо шургуулчихлаа” гэж ярьжээ.
Экс Ерөнхийлөгч Н.Энхбаярыг Л.Оюун-Эрдэнэ байхад нь уг асуудлыг огт яриагүй, чимээгүй явсан атлаа буусных нь дараа матаж, хүний бөгсийг ухлаа гэж буруутгах нэгэн ч байна.
Тухайлбал, Ерөнхий сайд асан С.Баяр “Манай энэ ийм сонин. Байхад нь нууна. Явахад нь зооно. Засрах шинж алга” гэж жиргэжээ.
Сануулахад, Л.Оюун-Эрдэнийн Засгийн газар өнгөрсөн зургадугаар сарын 15-ны өдөр Монголын Гашуунсухайт боомтыг Хятадын Ганцмод боомттой холбох төмөр замын бүтээн байгуулалтын албан ёсоор эхлүүлсэн. Үүнээс өмнө хоёр улсын Засгийн газар хил холболтын төмөр замын бүтээн байгуулалтын талаар хэлэлцээр байгуулж, үе шаттай ажлууд хийгдсэн. Хятадын талаас хил холболтын бүтээн байгуулалтыг хийхдээ гурван үндсэн шаардлага тавьсны нэг нь Хятадын "Чайна Энержи" компани Эрдэнэс Тавантолгой ХК-тай 16-20 жилийн хугацаатай гэрээ байгуулж, 2025-2029 онд 27 сая тонн, 2030 оноос 20 сая тонноос багагүй нүүрс тогтмол авахаар тусгасан байдаг.
