Нийслэлийн 2025-2026 оны өвөлжилтийн бэлтгэл ажлын хүрээнд нийт 750 төсөл, арга хэмжээг хэрэгжүүлж, бэлтгэл ажил 63 хувийн гүйцэтгэлтэй үргэлжилж байгаа юм. 2025-2026 оны хичээлийн шинэ жил эхлэх гэж буйтай холбогдуулан нийслэлээс сургууль, цэцэрлэгийн шугам сүлжээний засвар, эмнэлгийн засвар, тэдгээрийг дулаанаар хангах ажилд нэмэлт санхүүжилт гаргасан байна. Тодруулбал, нийслэлийн боловсрол, эрүүл мэндийн салбарын өвөлжилтийн бэлтгэл ажлын хүрээнд нийслэлийн Засаг даргын нөөц хөрөнгөөс 6.2 тэрбум төгрөгийн нэмэлт санхүүжилт гаргаж, дараах ажлуудыг гүйцэтгэж эхэллээ.

Энэ талаар нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин мэдээлэл өглөө. Тэрээр “Нийслэлийн Засаг даргын нөөц хөрөнгөөс гаргасан нэмэлт санхүүжилтээр нийт 11 сургуулийн гадна шугам сүлжээ, 9 цэцэрлэгийн шугам сүлжээний засвар хийхээр бэлтгэл ажлыг өнөөдөр эхлүүллээ. Түүнчлэн 7 эмнэлгийн гадна шугам сүлжээ, 8 эмнэлгийн дотор засварын ажлыг хийнэ. Нийт 20 уураар халдаг дулааны зуухыг шинэчилнэ. Ингэснээр төдий хэмжээний сургууль, цэцэрлэг, өрхийн эмнэлгийг нүүрсний хэрэглээгүй болгож, энэ нь агаарын бохирдлыг бууруулахад хувь нэмрээ оруулна” гэсэн юм.