Нобелийн энх тайвны шагналт, АНУ-ын Дэд ерөнхийлөгч асан Аль Гор, түүний үүсгэн байгуулсан The Climate Reality Project байгууллага 2025 оны 10 дугаар сарын 2–3-нд Монгол Улсын нийслэл Улаанбаатар хотноо Climate Reality Leadership Corps манлайллын сургалтыг зохион байгуулах гэж байна.
Энэхүү танхимын сургалт нь 2006 онд байгуулагдсан The Climate Reality Project ашгийн бус байгууллагын түүхэн дэх 61 дэх удаагийн сургалт бол Улаанбаатар хот нь 2025 REALITY® аялалд багтаж буй дөрөв дэх зогсоол юм. Аялал нь 2025 оны 11 дүгээр сард Бразил улсад зохиогдох COP30 буюу НҮБ-ын Уур амьсгалын өөрчлөлтийн суурь конвенцын Талуудын 30-р бага хурлыг угтуулан дэлхий даяар зоримог, өргөн далайцтай уур амьсгалын үйл ажиллагааг шаардах хамтын, дэлхий нийтийн уриалгыг бий болгох зорилготой.
2025 оны REALITY® аялал дэлхийг аялан тойрч Парис, Найроби, Рио-де-Жанейро хотуудад зохиогдох явцдаа уур амьсгалын хямралыг илүү гүнзгий ойлгож, бодит шийдлүүдийг хэрэгжүүлэх ур чадварт суралцахыг зорьсон оролцогчдыг нэгтгэсээр ирлээ. Мөн The Climate Reality Project нь танхимын сургалтаас гадна, АНУ-ын Дэд ерөнхийлөгч асан Аль Горын нэрийн хуудас болсон уур амьсгалын илтгэл зэрэг онцгой цахим сургалтын агуулгыг дэлхий даяар үнэ төлбөргүй хүргэсээр байна.
Бразилд болох чухал ач холбогдолтой COP30 уур амьсгалын хэлэлцээрээс хэдхэн долоо хоногийн өмнө зохиогдож буй Улаанбаатар дахь энэхүү сургалт нь оролцогчдод уур амьсгалын чиглэлээр ажилладаг салбарын идэвхтнүүд, манлайлагчидтай танилцаж, хамт олны харилцаа тогтоох, уур амьсгалын шинжлэх ухаан болон шийдлүүдийн талаарх хамгийн сүүлийн үеийн мэдлэг олж авах, мөн уур амьсгалын асуудлаар олон нийттэй харилцах, нөлөөлөл үзүүлэх ур чадвараа хөгжүүлэх чухал боломжийг олгож байна.
Сургалтаар Монгол Улсад иргэдийн оролцоонд суурилсан хөдөлгөөнийг хэрхэн өрнүүлж, эрчим хүчний бие даасан байдлыг хангах улс төрийн хүсэл эрмэлзлийг бий болгох, мөн сэргээгдэх эрчим хүчний үлэмж нөөц бололцоогоо ашиглан нүүрсний эрчим хүчнээс үе шаттайгаар татгалзах шилжилтийг хэрхэн эрчимжүүлэх талаар судална. Үүнээс гадна, цэвэр эрчим хүчний санхүүжилтийг нэмэгдүүлэх боломжуудыг хэлэлцэж, уур амьсгалын шударга ёсны цогц асуудлуудыг хөндөх бөгөөд үүнд нүүрснээс үүдэлтэй агаарын бохирдлын олон нийтийн эрүүл мэндэд үзүүлэх нөлөөлөл, уламжлалт нүүдлийн соёл, өв уламжлалыг хамгаалах, мөн Монголын тал хээрт нутагшсан биологийн олон янз байдлыг хадгалж үлдэхийн тулд цөлжилттэй хэрхэн тэмцэх зэрэг сэдвүүдийг онцолно.
Оролцогчид АНУ-ын Дэд ерөнхийлөгч асан Аль Гораас Монголын онцлог, жишээг онцолсон уур амьсгалын шинжлэх ухаан, нөлөө болон шийдлийн талаар танилцуулга яриаг шууд сонсохоос гадна The Climate Reality Project-ийн Гүйцэтгэх захирал Филлис Каттино, Green Climate Fund сангийн Гадаад харилцааны захирал С.Оюун, Solutions for our Climate байгууллагын Гүйцэтгэх захирал Ким Жүүжин зэрэг өндөр түвшний илтгэгчдийг сонсох болно.
“Уур амьсгалын хямралын бодит байдал Монгол Улсад илэрхий мэдрэгдэж байна. Монгол Улс олон жилийн туршид малтмал түлшний нөөцдөө тулгуурлан хөгжиж ирсэн боловч нүүрсийг түлшинд ашиглах нь хорт агаарын бохирдол үүсгэж, цаг уурын эрс тэс үзэгдлийг нэмэгдүүлж буй нь тодорхой болсоор байна. Монголын ард түмэн өнөөдөр хөгжлийн өөр замыг сонгох онцгой боломжийн өмнө ирээд байна” хэмээн АНУ-ын Дэд Ерөнхийлөгч асан ноён Альберт Гор хэмээн онцлов. “Улаанбаатар дахь сургалтаараа бид Монгол Улс сэргээгдэх эрчим хүчний арвин нөөцөө хэрхэн үр ашигтай ашиглах талаар хамтдаа судалж, оролцогчдыг Монголын цэвэр, эрүүл ирээдүйг бүтээх чадвартай, идэвхтэй манлайлагчид болгох, хамтын үйлдэл, өндөр үр нөлөөтэй нөлөөллийн ажилд уриалж, өнгөрсөн хугацаанд ахиц гаргахад саад болсон геополитикийн сорилтуудыг даван туулахад чиглүүлэх болно.”
Сургалтыг амжилттай дүүргэсэн оролцогчид дэлхий даяар 3.8 сая дэмжигч, мянга мянган идэвхтэй манлайлагчийг нэгтгэсэн Climate Reality Leadership Corps хөтөлбөрийн бүрэн эрхтэй гишүүн болно. Энэ сүлжээнд уур амьсгалын үйл хэрэгт бодитой өөрчлөлт авчрахын төлөө хүчээ нэгтгэгч манлайлагч идэвхтнүүд, бизнесийн төлөөллүүд, энтрепренерүүд, сонгогдсон төлөөлөгчид, орон нутгийн иргэд, оюутнууд зэрэг нийгмийн бүх түвшний оролцогч талууд багтдаг.
Сургалтад оролцохыг хүсэгчид The Climate Reality Project-ийн албан ёсны цахим хуудсаар дамжуулан онлайнаар бүртгүүлнэ. Сургалт монгол хэл дээр зохион байгуулагдах ба англи хэл дээр явагдах хэсгүүдэд мэргэжлийн орчуулга хийгдэнэ.
Бүртгэлийн хугацаа 2025 оны 9 сарын 1-нд хаагдана.
The Climate Reality Project-ийн тухай
Нобелийн энх тайвны шагналт, АНУ-ын дэд ерөнхийлөгч асан Ал Горын үүсгэн байгуулсан The Climate Reality Project нь уур амьсгалын хямралын эсрэг дэлхий нийтийн шийдлийг хэрэгжүүлэхийн тулд нийгмийн бүх түвшинд яаралтай арга хэмжээ авахыг идэвхжүүлэн ажилладаг. Тус байгууллага нь 3.8 сая гаруй гишүүн, Climate Reality Leadership Corps-оор бэлтгэгдсэн манлайлагчдын хамтаар уур амьсгалын хямралын үнэн бодит байдлыг түгээж, цэвэр эрчим хүчний шийдлүүдэд олон нийтийн дэмжлэгийг татан төвлөрүүлж байна.
X, Instagram, Facebook хуудсаар дагаарай.
