Боловсролын зээлийн сангийн сонгон шалгаруулалтаас хасагдсан хүүхдүүдийн эцэг эхчүүдийн төлөөлөл мэдээлэл өглөө. Боловсролын зээлийн сангийн шинэчилсэн журмын хүрээнд олон хүүхдийн материал шаардлага хангаагүй гэх үндэслэлээр хүчингүйд тооцогджээ. Эдгээр хүүхдүүд нь гадаадын нэр хүндтэй топ их, дээд сургуулиудад тэнцэж, журамд заасан баримт бичгээ бүрдүүлэн, материалыг цаг хугацаанд нь хүргүүлсэн байсан ч сонгон шалгаруулалтаас хасагдсан байна.

Эцэг эхчүүдийн хэлснээр хүүхдүүдийн материал нь журамд нийцэж байсан бөгөөд тэд онгоцны тийзээ захиалж, суралцах бэлтгэлээ бүрэн хангаад байжээ. Гэвч санхүүгийн төлбөр байхгүй учир Боловсролын зээлийн санд найдан материалаа өгсөн ч, шаардлага хангаагүй гэсэн шалтгаанаар татгалзсан хариу авсан байна. Тэдний үзэж байгаагаар шалгарсан бусад хүүхдийн оноо, материалтай өөрсдийн материалыг харьцуулахад ямар нэгэн асуудал байгаагүй байна. Тиймээс шударга байдлыг хангаж, тэдэнтэй уулзаж, гомдлыг нь сонсохыг хүсэж байгаа юм.

Мэдээлэл өгсөн хүмүүсийн дунд хөгжлийн бэрхшээлтэй иргэдийн эрхийн төлөө дуу хоолойгоо хүргэж ирсэн ээж ч байлаа. Монгол Улсын хуулиар, гадаадын топ 100 их дээд сургуульд тэнцсэн хөгжлийн бэрхшээлтэй иргэнд улсын зээлийн сангаас зээл олгох зохицуулалт бий. 2024 онд анх удаа хоёр иргэнд энэ төрлийн зээл олгосон байна. Гэвч бодит байдал дээр хөгжлийн бэрхшээлтэй хүүхдүүд боловсролын шат бүрт гадуурхагдаж байгааг нэгэн ээж хэлсэн юм. Энэ ээжийн хүү аутизмтай бөгөөд монголын сургуулиуд танай хүүг аюулгүй суралцуулах нөхцөл бидэнд байхгүй гэсэн шалтгаанаар хүлээн аваагүй байна. Тийнхүү хүүхдээ боловсрол эзэмшүүлэхийн тулд Австралид эгч рүү нь явуулж байжээ. Тэдэнд тулгарсан асуудал бол Монголд дээд боловсрол эзэмшээгүй гэх үндэслэлээр Боловсролын зээлийн сан зээл олгохоос татгалзсан байна.