Засгийн газрын хуралдаанаар Эрүүл мэндийн салбарт чухал ач холбогдолтой нэгэн шийдвэр гарсан нь Улсын гуравдугаар төв эмнэлгийн дэргэд Зүрх судасны бие даасан төв байгуулахаар болжээ. Нийт 55.3 сая долларын өртгөөр орчин үеийн шаардлага хангасан эмнэлэг барихаар болсон байна. Нийт санхүүжилтийн 22.4 сая доллар нь буцалтгүй тусламж байх юм. Энэ талаар Эрүүл мэндийн сайд Ж.Чинбүрэн мэдээлэл өглөө.

Тэрээр "Монгол Улс Люксембургийн Вант улстай хамтран 24 жилийн турш Улсын гуравдугаар төв эмнэлэгт зүрх судасны өвчлөлийг бууруулах, харвалт, шигдээсийн нас баралтыг багасгах зорилготой төсөл хэрэгжүүлж ирлээ. Энэ хамтын ажиллагааны нэг том үр дүн нь орчин үеийн Зүрх судасны төв байгуулах шийдвэр юм.

Төслийн санхүүжилтийн гуравны нэгийг буцалтгүй тусламжаар, гуравны хоёрыг Сэргээн босголтын банкны зээлээр хангах юм. Монгол Улсад зүрх судасны өвчлөл нас баралтын тэргүүлэх шалтгаан хэвээр байна. Өнгөрсөн онд гэхэд 18,200 хүн энэ өвчнөөр нас барсан бөгөөд тэдний 6000 орчмыг түргэн тусламж цаг тухайд нь очиж, эрчимт эмчилгээ чанартай үзүүлсэн бол аврах боломжтой байжээ.

Шинэ зүрх судасны төв нь 15,600 м² талбайтай, зоорийн давхартайгаа найман давхар цогцолбор баригдах юм. Тус эмнэлэгт судсан дотуурх мэс заслаас эхлээд зүрх шилжүүлэн суулгах хүртэлх бүх төрлийн эмчилгээ хийх боломжтой. Мөн орон нутгийн яаралтай тусламжийн багийг сургах, судсан дотуурх эмчилгээний мэргэжилтэн бэлтгэх тогтолцоог бий болгох юм. Энэхүү төслийн онцлог нь эхлэлээс нь ашиглалтад оруулж, тоног төхөөрөмжийг бүрэн суурилуулан эмчилгээ хийх хүртэл бүх ажлыг Люксембургийн Вант улс өөрсдийн хөрөнгөөр гүйцэтгэхээр болсон явдал юм. Энэ нь олон улсын хамтын ажиллагааны үлгэр жишээ гэж үзэж байна" гэв.