Улсын онцгой комиссын өнөөдрийн /2025.08.11/ хуралдаанаас өвөлжилтийн бэлтгэл хангах хүрээнд хэд, хэдэн арга хэмжээг авахыг үүрэг болгосон талаар УИХ-ын гишүүн, Шадар сайд С.Амарсайхан болон холбогдох албан тушаалтнууд мэдээлэл хийлээ.

УИХ-ын гишүүн, Шадар сайд С.Амарсайхан: Ургац хураалтын цаг үед шатахууны хомсдол, зохиомол үнийн хөөргөдөл үүсэх, худал мэдээлэл түгээхээс  урьдчилан сэргийлэх арга хэмжээг цаг тухай бүрд нь хэрэгжүүлэх асуудлуудыг хэлэлцэж дүгнэлээ.

Мөн өвс тэжээлийн хангамж, нийлүүлэлттэй холбоотойгоор байгалийн буюу бэлчээрийн ногоон өвс экспортлохыг нэн даруй хориглох, зогсоох шаардлагатай. Яагаад гэвэл бид дотооддоо боломжтой газар нь аймаг, сумуудад нийлүүлэх ёстой. Түүнчлэн, отор нүүдэл зохион байгуулах төлөвлөлтөө сайн хийх ёстой. Ингэхдээ аймаг орон нутагт оторлох мал сүргийн бүртгэл тооцоог сайтар гаргаж, малын гоц халдварт өвчнөөс эхлээд ямар нэг хүндрэл гаргахгүй байхад онцгой анхаарах хандуулах шаардлагатай байна.

Хадлан тэжээл бэлтгэх боломжтой Сүхбаатар, Дорнод, Хэнтий аймгийн бүс нутгийг хамгаалах, цаашид бэлчээрийг нөхөн сэргээх, хадлангийн нөөц нэмэгдүүлэх чиглэлээр тусгайлсан бодлого арга хэмжээ төлөвлөгөө гарган хэрэгжүүлэхийг Хүнс хөдөө аж ахуй хөнгөн үйлдвэрийн яаманд даалгалаа. 

Боловсролын салбарт хүүхэд багачуудын сургууль, цэцэрлэг орохоос өмнө хичээл эхлүүлэх нөхцөл боломжийг бүх түвшинд зохион байгуулж, барилга байгууламжийн ажил, бүтээн байгуулалтын ажиллагааг эрчимжүүлэх, стандарт, чанарын өндөр түвшинд, хийж гүйцэтгэхийг үүрэг болголоо. 

Эрүүл мэндийн байгууллага улаанбурхан өвчнөөс эхлээд томуу, томуу төст өвчинтэй хавсарсан эрсдэлүүд өвөл, намар бий болохгүй байхаас урьдчилан сэргийлж, дархлаажуулалтын ажлаа эрчимжүүлж байна. Нөгөө талаараа халдварт болон халдварт бус өвчнөөс урьдчилан сэргийлэх урьдчилсан үзлэг, хяналтын ажлуудаа хийж аль болох хүүхэд багачуудад, эцэг эхчүүдэд хүндрэлгүйгээр сургууль, цэцэрлэгийн бэлтгэлийг хангах чиглэлээр үүрэг даалгаврууд өглөө. 

Хамгийн сүүлд Нийслэлийн Засаг дарга, ХХАА-н яамд нийслэлийн хүн амын махны нөөцийг бэлтгэх, үнийн хөөргөдлөөс урьдчилан сэргийлэх, махны хомсдол, хязгаарлалтыг бий болгохгүй байх талаар авч хэрэгжүүлэх шаардлагатай арга хэмжээний талаар хэлэлцлээ.

Малчид иргэд өвлийн бэлтгэлээ сайтар хангаж, өөрсдөөс шалтгаалах бүх зохион  байгуулалтаа сайтар хийхийг хүсье. Гантай жилийн өвөл хахир хатуу болдог гэдгийг хүн бүр мэднэ. Бэлтгэл хэдий чинээ сайн байна, аливаа эрсдэлийг хохирол багатай даван туулах боломж бүрдэнэ.

Хүнс, хөдөө, аж ахуй хөнгөн үйлдвэрийн яамны Төрийн нарийн бичгийн дарга Т.Жамбалцэрэн: Газар нутгийн 30-аад хувь нь гантай байна. Өдрийн хэт халалт, шөнийн хүйтний  агаарын температурын зөрүүнд  тариалангийн гол бүс нутагт ургац алдах эрсдэл бий болсон. Гангийн нөхцөл байдлаас болоод таримал тэжээлийн дутагдалд нэлээд их хэмжээгээр орох байх.  Байгалийн хадлан бэлтгэх боломжтой бүс нутгийн газрын судалгааг гаргаж, тогтоож байна. Салбарын яамнаас  гурван сая га талбайд отор нүүдэл зохион байгуулахаар төлөвлөж, сум, аймагт үүрэг чиглэл өгөөд гэрээгээ байгуулаад ажиллаж байна.

Улсын чанартай есөн отрын бүс нутаг бий, тэнд 1 сая толгой мал өвөлжүүлэх бэлтгэл ажил ханган ажиллаж байна.  Импортын өвс тэжээл дээр хүчитгэсэн тэжээл импортоор авч таарна. Хил залгаа гол бүс нутагт чиглэл өгөөд импортлогч аж ахуй нэгжээс үнийн судалгаа аваад ажиллаж байна.

Энэ жилийн тухайд баруун бүсийн дөрвөн аймаг, төвийн бүсийн аймгуудад өвөлжилт хүндрэх эрсдэлтэй судалгаа гарч байна. Хүнс хөдөө аж ахуй хөнгөн үйлдвэрийн яам, Онцгой байдлын ерөнхий газар, Цаг уур орчны шинжилгээний газраас хамтарсан ажлын хэсэг гараад гангийн эрсдэлийн үнэлгээ хийсэн. Улсын онцгой комиссын даргын тушаалаар шуурхай ажлын хэсэг гараад ажиллаж байна. Наймдугаар сарын 15-нд ургацын баланс гарна.

Эдийн засгийн эргэлтэд оруулах малын судалгаа гаргаж, дотоодын аж ахуй нэгжүүдтэй холбогдох гэрээ хэлэлцээр хийж, экспортод гаргахад нь дэмжлэг үзүүлж ажиллах чиглэлээр ажиллаж байгаа болно.