“Утаа” гэж өдөр алгасахгүй ярихад хүргэдэг өвлийн улирал юу юугүй хаяанд ирлээ. Гэвч Улаанбаатар хот ирэх өвөл түлэх түлшний асуудал одоог хүртэл тодорхойгүй байна.

Монгол Улсад өвлийн улиралд агаарын бохирдол гамшгийн хэмжээнд хүрдэг нь нууц биш. Ялангуяа Улаанбаатар хотын гэр хорооллын айл өрхүүд халаалтаа түүхий нүүрс болон сайжруулсан шахмал түлшээр хангадаг нь агаарын бохирдлын гол эх үүсвэр болдог. Үүнийг шийдвэрлэхийн тулд ирэх жилээс БНХАУ-аас хагас коксжсон нүүрс импортлон хэрэглээнд нэвтрүүлэхээр төлөвлөж байна. Ингэснээр өвлийн улиралд агаарын бохирдлыг бууруулахад тодорхой хэмжээнд үр дүнтэй шийдэл болж чадна гэж холбогдох албан тушаалтнууд үзэж буй.

Тодруулбал, энэ жил манай улс Хятадаас 226 тэрбум төгрөгийн өртөгтэй хагас коксжсон нүүрс худалдан авах төлөвлөгөөтэй байгаа аж. Хотын дарга Х.Нямбаатарын хэлснээр Үндэсний хороо хагас коксжсон нүүрсийг хэрэглээнд нэвтрүүлэх нь хүн амын эрүүл мэндэд эерэг нөлөөтэй гэж үзсэн учраас энэ шийдвэрийг гаргажээ. Тэрээр “800 градуст жигнэж, химийн хортой нэгдлийг ялгасан хагас коксжсон нүүрсийг импортлон, савлан хэрэглээнд нэвтрүүлэхээр төлөвлөж байна” гэж онцолсон. Харин иргэдийн зүгээс нүүрсээ экспортолдог орон гаднаас нүүрс авах гэж байгаад шүүмжлэлтэй хандаж байна. Гэвч иргэдийн анхаарал баяр наадам, аялал зугаалга руу шилжсэн үеэр тендерийн явц аль хэдийн явагдаж, Хятадын компанитай гэрээ байгуулсан байна. 

Коксжсон нүүрс нь сайжруулсан шахмал түлшийг орлох, агаарын бохирдлыг бууруулахад хэр үр дүнтэй шийдэл болох вэ?