Монгол Улс Японы Засгийн газрын хөнгөлөлттэй зээлээр 2021 онд Чингис хаан олон улсын нисэх буудлыг ашиглалтад оруулсан. Японтой хийсэн концессын гэрээний дагуу 15 жилийн хугацаанд Чингис хаан олон улсын нисэх буудлын менежментийн үйл ажиллагааг Японууд хариуцахаар болсон билээ. Шинэ нисэх буудал ашиглалтад орсноор хуучин Буянт-Ухаа нисэх буудлыг хэрхэх вэ гэдэг асуудал гарсан. Засгийн газрын 455-р тогтоолын дагуу Буянт-Ухаа нисэх буудалд хувийн онгоц, сургалт дадлагын нислэг болон МИАТ болон бусад агаарын тээвэрлэгч нарын засварт орох шаардлагатай онгоцнуудыг засварлах, ОБЕГ-ын аврах багийн нислэгүүд, Батлан хамгаалах чиглэлийн зарим нислэгүүд хийгдэж байгаа аж. Цаашдаа Чингис хаан олон улсын нисэх буудал ачааллаа дийлэхгүй нөхцөл байдал үүсвэл орон нутгийн нислэгүүдийг Буянт-Ухаа нисэх буудалд хүлээн авах асуудлыг Японы талд тавьсан гэдгийг Зам, тээврийн сайд Б.Дэлгэрсайхан илэрхийлэв.
Энэ талаар Зам, тээврийн сайд Б.Дэлгэрсайхан: Хуучин нисэх буудал буюу Буянт-Ухаа дээр завсар хийж байна. Өнөөдрийн байдлаар төрийн айлчлалын, тусгай гийчний онгоц, хувийн захиалгат онгоцууд хөөрч, буух байдлаар ашиглаж байна. Ер нь Чингис хаан олон улсын нисэх буудлыг бариулахдаа Япон улстай хийсэн гэрээний дагуу 100 км-ийн радиус дотор ижил төрлийн бизнес эрхлэхгүй байх нөхцөлтэй. Миний бие Чингис хаан нисэх буудлыг өргөтгөх асуудлаар Японы талтай уулзалтууд хийсэн. Жайка болон Японы Элчин сайдын яам, мөн зураг төслийг нь хийсэн Оринтал компани гээд гурван талын төлөөлөлтэй уулзалт хийсэн. Шинэ нисэх буудлын өргөтгөлийг 2026 онд хийнэ.
Өнөөдрийн байдлаар Монгол Улс өдөрт 70-80 нислэг хүлээн авч байгаа. Цаашид энэ тоо нэмэгдэж, шинэ нисэх буудлын ачаалал хүрэлцэхгүй байдалд байвал бид давагдашгүй хүчин зүйл гэж үзээд хуучин нисэх буудлаа орон нутгийн онгоцны буудал болгож хэрэглэнэ шүү гэдэг саналаа Японы талд илэрхийлсэн. Өмнө зурагдсан том гэрээгээ тойрч гарах боломжийг хайж байгаа.
