Мэдээлэл, технологийн үндэсний парк /МТҮП/ бол төрийн өмчит үйлдвэрийн газар. Энэ паркийн хойд жигүүрт “Өргөө-2” кино театр 2011 оноос хойш үйл ажиллагаагаа явуулж байгаа. Тус компанийн гэрээ 2022 оны арванхоёрдугаар сарын 31-нд дууссан ч талбайгаа чөлөөлөхгүй, шүүхдэж байгаа аж.

Жилийн хугацаанд шүүх хурал есөн удаа хойшилсон бөгөөд анхан болон давж заалдах шүүхээс Мэдээлэл, технологийн үндэсний парк өөрийн байраа буцаан авах нь зөв гэсэн шийдвэр гарсан байдаг. Гэвч өнөөдрийг хүртэл “Нью Тур Сафарис” ХХК нь шүүхийн шийдвэрийг биелүүлээгүй, үйл ажиллагаагаа тасралтгүй үргэлжлүүлсээр байна. Үүгээр зогсохгүй хоёр давхарт 24 цагийн үйл ажиллагаатай E sport тоглоомын төв, нэг давхарт гадаадын хөрөнгө оруулалт бүхий “Ажин шарсан мах” гэх мэт хятад түргэн хоолны газартай гэрээ байгуулж ашиглаж эхэлжээ. Энэ талаар Мэдээлэл, технологийн үндэсний паркийн захирал Ж.Золзаяа өөрийн цахим хуудсаараа дамжуулан хүргэсэн. Тэгвэл түүнээс нөхцөл байдлын талаар тодруулснаа хүргэе.

Мэдээлэл, технологийн үндэсний паркийн захирал Ж.Золзаяа: Анхан болон давах шатны шүүх хурал дээр 2022 оны арванхоёрдугаар сарын 31-нд гэрээ нь дууссан учраас албадан чөлөөлөх ёстой гэсэн шийдвэр гарсан. Одоо албажих шатандаа явж байгаа. Гэвч шүүхийн шийдвэрийг үл хүндэтгэн Өргөө II кино театр E-sport-ын газар нээх, өнгөрсөн долоо хоногоос эхлээд хятад шарсан махны газар IT Park дотор нээх ийм үйлдлүүд шат дараатай гарч байна. Нөгөө хүмүүстээ шүүхийн маргаантай байгаагаа хэлээгүй юм билээ. Яагаад гэвэл хятад хүнд түрээслүүлж, нөгөө хүн нь Монголын нөхцөл байдлын мэдээллийг аваагүйгээс тохиролцсон байна. Бидэнд энэ талаар мэдэгдэхгүйгээр өөрийн өмч мэт түрээсэлсэн гэж хэлж байгаа төрийн өмчийг, IT Park-ийг, мэдээллийн технологийн салбарыг үл хүндэтгэсэн хэрэг. Ер нь цаг аваад цаашдаа ямар нэгэн башир аргаар үлдэж байх гэсэн арга хэрэглээд байгаа. Одоо дээд шүүхэд хандах цөөн хоног үлдсэн.  Анхан шатны шүүхийн шийдвэрийг давах шат бататгасан учраас дээд шүүх рүү хандсан ч цаг авах байдлаас хандана уу гэхээс шийдвэр өөрчлөгдөхгүй гэсэн байр суурийг манай өмгөөлөгч надад хэлсэн. Бидний зүгээс маш их ажлыг төлөвлөсөн. Гэтэл нэг газартай шүүхдэлцээд янз бүрийн зарга хийгээд яваад байх бус харин энэ дотор байгаа мэдээллийн технологийн компаниудад илүү тусалмаар байна. Монгол Улсад байгаа 400 гаруй мэдээллийн технологийн компаниудаа төв Азийн зах зээл, Япон, Америк зэрэг гаднын улс орнууд руу технологийн экспортыг хийхийг зорьж байгаа юм. Энэ салбараа хөгжүүлж, хуулийн хэрэгжилтээ хангаж виртуал бүс гэх ойлголтыг Монголд бий болгохоор ажиллаж байгаа. Өргөө кино театрыг гаргасны дараа тэндээ хиймэл оюун ухааны лаборатори, дата төв, инкубаторуудынхаа тоог нэмэх гэх мэтчилэн олон ажлыг аль хэдийн төлөвлөсөн.