АНУ-ын Ерөнхийлөгч Дональд Трамп Оросын Ерөнхийлөгч Владимир Путинд хандан Украины дайны асуудлаар 10 эсвэл 12 хоногийн дотор тодорхой алхам хийх эцсийн хугацаа өглөө. Хэрэв ахиц гарахгүй бол Трамп Орос болон түүний экспортын гол худалдан авагч орнуудад шинэ хориг арга хэмжээ авах болно гэж анхааруулжээ.

Өнгөрсөн долоо хоногт Орос, Украины дипломат төлөөлөгчид Туркийн Истанбул хотод уулзсан ч хоригдлууд солилцохоос өөр тодорхой зүйл дээр тохиролцоонд хүрээгүй байна. Украины Ерөнхийлөгч Володимир Зеленский наймдугаар сарын сүүлчээр ОХУ-ын Ерөнхийлөгч Владимир Путинтэй дээд хэмжээний уулзалт хийх санал тавьсан ч Оросын тал зөвхөн хэлэлцээрт гарын үсэг зурах шатанд хүрсэн нөхцөлд уулзалт хийх боломжтой хэмээн мэдэгджээ. 

Сүүлийн долоо хоногт Трампын мэдэгдлүүд өмнөхөөсөө зөөлөн, эв зүйг эрэлхийлсэн байр сууринаас нэлээд өөрчлөгдөж байна. АНУ-ын дипломат төлөөлөгчид БНХАУ-аас ОХУ-д хоёр талын (цэргийн болон иргэний) зориулалттай бараа бүтээгдэхүүн нийлүүлэхээ зогсоохыг уриалсан. АНУ-ын зүгээс эдгээрийг Оросын цэргийн аж үйлдвэрийн салбарт хувь нэмэр оруулж байна гэж үзэж буй юм.

Шинэ хориг арга хэмжээ ойртож байна

Хоёр долоо хоногийн өмнө Трамп хэрэв Путин гал зогсоох яриа хэлэлцээ эхлүүлэхгүй бол ОХУ-ын эсрэг шинэ, хүчтэй хориг арга хэмжээ авахаа амласан. Долоодугаар сарын 15-нд НАТО-гийн Ерөнхий нарийн бичгийн дарга Марк Рюттетэй уулзах үеэрээ Трамп Европын холбоотнууд Украинд олон тэрбум долларын зэвсэг (түүний дотор Patriot пуужингийн эсрэг хамгаалалтын систем) нийлүүлэхээр тохиролцсон билээ.