Төсвийн ерөнхийлөн захирагч нар Төсвийн төсөл бэлтгэх удирдамжийн дагуу 2026 оны хөрөнгө оруулалтын саналаа Сангийн яаманд хүргүүлж буй. Энэ нь хуулийн хугацаатай бөгөөд санал авах хугацаа өнөөдрөөр дуусгавар болж байгаа. Энэ ажлын хүрээнд Засгийн газар, Сангийн яам УИХ-д тойргоос сонгогдсон 78 гишүүн бүрээс 15 тэрбум төгрөгийн хөрөнгө оруулалтын санал авч, "гишүүдийг авлигадах" ажлыг зохион байгуулж байна хэмээн Иргэний зориг ногоон намын квотоор УИХ-ын гишүүн болсон М.Нарантуяа-Нара нийгмийн сүлжээнд мэдээлжээ.
Эл асуудлаар УИХ-ын гишүүн М.Нарантуяа-Нара ганцаараа шүгэл үлээгээгүй, МАН-ын жагсаалтаар УИХ-ын гишүүн болсон Х.Баасанжаргал тойргийн төсвийн талаарх мэдээллийг анх нийт гишүүдийнхээ группэд бичсэнээр тойргийн төсвийн хуйвалдааныг мэдлээ гэж М.Нарантуяа-Нара гишүүн тодотгосон байна.
Улсын төсөвт "тойргийн гишүүний төсөв" гэсэн тусгайлан заасан заалт, нэр томьёо байхгүй ч Засгийн газар төсвийн төслөө бэлтгэхдээ тойргийн гишүүн бүрээс саналыг нь авч, хөрөнгө оруулалтын зардалдаа шингээж ирсэн. Гэхдээ сүүлийн жилүүдэд тойргийн төсөв гэдэг ойлголт байхгүй болсон гэсэн үгс Ерөнхий сайд асан Л.Оюун-Эрдэнийн амнаас хэдэнтээ гарч байв.
Тэгвэл Г.Занданшатарын Засгийн газар УИХ-ын гишүүдийг тойргийн төсөв нэрээр авлигадаж, Ерөнхий сайд, Засгийн газрынхаа насжилтыг уртасгах төлөвлөгөөндөө орсон бололтой.
"Тойргийн төсөв" гэдэг ойлголтыг 2000-аад оны үед буюу Н.Энхбаяр Ерөнхий сайдаар ажиллаж байхдаа анх эхлүүлсэн гэдэг. Тухайн үед УИХ-ын гишүүдэд тойрогтоо ажиллахад нь зориулж 10 сая төгрөг өгөх хуулийн төсөл санаачилж батлуулсан. Дараа нь Ерөнхий сайд асан Ц.Элбэгдорж 10 дахин өсгөж 100 сая, МАН-ын дарга М.Энхболд Ерөнхий сайд байхдаа 500 сая төгрөгт хүргэсэн удаатай. Дараа, дараагийн засаг нь бүр нэг тэрбум, дөрвөн тэрбумд хүргэх төсөл ч оруулж ирж байв.
Тэгвэл Г.Занданшатарын Засгийн газрын үед тойргийн мөнгө түүхэн дээд хэмжээнд буюу 15 тэрбум төгрөгт хүрэх бололтой. Өнөөдрийн байдлаар улсын төсвийн тэнцэл 1 их наяд төгрөгийн алдагдалтай, Монгол Улсын гол орлого болох нүүрсний экспортын орлого 2.5 тэрбум ам.долларын бууралттай байна. Гэтэл Засгийн газар өнгөн дээрээ "төсөв хүнд байна, хэмнэлт хийнэ" гэж ярьчихаад хөшигний цаана тойргийн гишүүн бүрд 15 тэрбум төгрөг хуваарилах хуйвалдааныг эхлүүлжээ.
