Нийслэлийн Засаг даргын тамгын газраас 2025 оны нэгдүгээр сард Туулын хурдны замыг барьж байгуулах төслийн гүйцэтгэгчийг сонгон шалгаруулах тендерийг зарласан. Тэгвэл тендерт Хонгконгийн ХаоЮань групп шалгарч, өнөөдөр гэрээ байгуулах эрхийг олгож байгаа талаар Нийслэлийн Замын хөгжлийн дарга Б.Одбаяр мэдээллээ.Туулын хурдны замын тендерт нийт 4 компани өрсөлдсөнөөс Хонгконгийн ХаоЮань групп хамгийн таатай нөхцөлийг санал болгосноор шалгарч, гэрээ байгуулах ажлыг эхлүүлж байгаа аж.Нийслэлийн Замын хөгжлийн дарга Б.Одбаяр: Туулийн хурдны зам ашиглалтад орсноор Улаанбаатар хотын нийт замын хөдөлгөөний эрчмийг 13.5 хувиар бууруулах нөлөөтэй гэсэн судалгаа гарсан. Цаашлаад Шинэ тойрог замтай холбогдсоноор нийслэлийн авто замын түгжрэлийг 40 гаруй хувиар бууруулах боломжтой гэж харж байна.Туулын хурдны замын бүтээн байгуулалтыг хийж гүйцэтгэхэд, газар чөлөөлөлтөд 116 нэгж талбар өртөж байгаа. Нэгдүгээр сараас газар чөлөөлөлтийн ажлыг эхлүүлж, өнөөдрийн байдлаар 16 байршилд бүрэн тохиролцоонд хүрч, чөлөөлсөн. Үлдсэн 100 байршилд хэлэлцээний шатанд ажлууд хийгдэж байна.
