Сонсголын бэрхшээлтэй, дохионы хэлээр харилцдаг монгол хүнийг хэлмэрчгүйгээр сар гаруй хугацаанд саатуулсны эцэст АНУ-ын Өмнөд Калифорни дахь цагаачлалын хорих ангиас сулласан талаар Америкийн мэдээллийн сайтууд мэдээлжээ.

CalMatters сайтад энэ сарын эхээр түүний нөхцөл байдлын талаар мэдээлсэн юм. Гэр бүлийнхэн нь түүнийг эх оронд нь буцаах тохиолдолд аюул учирч болзошгүй хэмээн болгоомжилж, түүнийг зөвхөн Авирмэд нэрээр нь танилцуулахыг хүссэн байна.

2025 оны долоодугаар сарын 9-нд АНУ-ын Калифорни мужийн Өмнөд бүсийн шүүхийн шүүгч Дана Сабро Отай Месагийн цагаачлалын хорих төвийн албаныханд Авирмэдэд зориулан монгол дохионы хэлний орчуулагч гаргаж өгөхийг тушаажээ. Түүнд өмнө нь хэл мэдэх орчуулагч олгоогүй байсан нь ганцаарчилсан хоригдол мэт нөхцөл байдалд хүргэсэн талаар өмгөөлөгч нь ярьжээ.

Шүүхийн баримтаас үзвэл, цагаачлалын албаныхан Авирмэдээс Монгол руу буцахаас айж байгаа эсэхийг асуухдаа Google Translate ашигласан ч түүнийг буруугаар ойлгож, спонсорыг нь Virginia Washington гэх нэртэй охин гэж тэмдэглэсэн байна. Гэтэл түүнд охин байхгүй, харин Виржиниа мужид амьдардаг эгч нь спонсор нь байсан аж. Эгч нь одоо түүнтэй хамт байгаа тухайгаа баталсан байна.