Өмнөд Солонгосын Тусгай прокурорууд 2024 оны арванхоёрдугаар сард ерөнхийлөгч асан Юн Сук Ёл цэргийн онц байдал зарлахаас өмнө Монгол Улсад хийгдсэн нууц ажиллагааны талаар мөрдөн шалгаж байна. Энэхүү ажиллагаанд хоёр тагнуулч Хойд Солонгосын албан тушаалтнуудтай холбоо тогтоохыг оролдсон байж болзошгүй гэж үзэж байгаа юм.

Шалгалт явуулж буй багийн таамгаар уг ажиллагаа нь Хойд Солонгосыг өдөөн хатгах эсвэл тэдэнтэй харилцаа тогтоох оролдлого байсан бөгөөд цаашлаад Юн Сук Ёлд онц байдал зарлах шалтаг, үндэслэл бүрдүүлэх зорилготой байсан байж болзошгүй аж.

Өмнөд Солонгосын өдөр тутмын “Хангёрэ” сонинд мэдээлснээр, 2024 оны арваннэгдүгээр сард БНСУ-ын Батлан хамгаалах яамны Цэргийн тагнуулын командлалын хоёр офицер Улаанбаатар явж, Монголын албан тушаалтнуудаар дамжуулан Хойд Солонгосын Элчин сайдын яамтай холбогдохыг оролдсон байна. Тэдний даалгавар Хойд Солонгосын талаарх тагнуулын мэдээлэл цуглуулах байсан бөгөөд тайландаа тус улсын Элчин сайдын яамыг зорилтот объект болгон дурдсан гэж мэдээлжээ.

Гэвч ажиллагааны үеэр тэднийг Монголын тагнуулын байгууллага саатуулж байв. Тийнхүү тухайн үеийн Цэргийн тагнуулын командлагч генерал Мүн Сан Ху Улаанбаатарт ирж суллуулах хүсэлт тавьсны дагуу сулласан юм. Генерал Мүн Сан Ху-г цэргийн онц байдал зарлах төлөвлөгөөнд холбоотой гэх үндэслэлээр 2024 оны арванхоёрдугаар сард албан тушаалаас нь түдгэлзүүлсэн билээ.