Дулааны гуравдугаар цахилгаан станцад 2025 оны зургадугаар сарын 2-ны шөнө осол гарч, есдүгээр турбогенератор ажиллагаагүй болсон. Энэхүү тоног төхөөрөмж нь тус станцын гол ачааллыг үүрэлцдэг байсан бөгөөд дахин засвар авахааргүйгээр эвдэрсэн гэж мэргэжилтнүүд мэдээлсэн. Ингэснээр Улаанбаатар хотын дулаан хангамжийн 31 хувь, төвийн цахилгаан эрчим хүчний 14 хувь, үйлдвэрийн уурын 47 хувийг хангаж ажилладаг "ТЭЦ-3"-ын үйл ажиллагаа доголдох эрсдэл үүссэн юм.

Засгийн газраас "ТЭЦ-3" дээр Онцгой дэглэм тогтоож, Бүрэн эрхт төлөөлөгчөөр Эрчим хүчний Төрийн нарийн бичгийн дарга Н.Тавинбэхийг томилон ажиллуулж буй. Ямартай ч "ТЭЦ-3" дээр үүссэн осол гэмтэлтэй холбоотойгоор хоёр үе шаттай арга хэмжээ авч ажиллахаар болжээ.

1. Осол гарсан обьектыг яаралтай буулгаж, сэргээн засварлах. Энэ ажил эхэлсэн бөгөөд 2025 оны арваннэгдүгээр сарын 15 гэхэд дуусгахаар төлөвлөсөн байна.
   Есдүгээр турбогенератор ажиллагаагүй болсон тул ирэх өвлийн гол ачааллыг хуваалцах үүднээс ашиглалтаас гарч, актлагдсан байсан өөр нэг турбогенераторыг дахин сэргээн засварлах ажлыг эхлүүлжээ. Энэхүү турбогенераторыг сэргээн завсарлах ажлыг наймдугаар сарын 15 гэхэд дуусгаж, сүлжээний тохируулгын ажлыг хийх аж.
2. Гэмтсэн ес болон долдугаар турбогенераторыг сэргээн шинэчлэх ажлыг эхлүүлсэн бөгөөд гүйцэтгэгчийг сонгон шалгаруулах ажил хийгдэж байгаа аж. Турбогенераторыг сэргээн шинэчлэх ажлын хүрээнд БНХАУ, ОХУ, Герман, Япон зэрэг улсын компаниуд үнийн саналаа ирүүлсэн байна. Урьдчилсан байдлаар Хятадын компаниудтай яриа хэлэлцээ хийж, үйлдвэрүүдтэй нь Монголын талаас газар дээр нь очиж танилцаж байгаа юм байна.

Энэ талаар "ТЭЦ-3"-ын Бүрэн эрхт төлөөлөгч Н.Тавинбэх: Хятадын үнийн санал ОХУ-аас ирүүлсэн үнийн саналаас хоёр дахин бага байгаа. Тиймээс Хятадыг сонгохоор эцэслэх болов уу. Бэлэн байгаа тоног төхөөрөмжийг газар дээр нь очиж үзсэн. Ашиглаж байсан тоног төхөөрөмжийг авч ашиглах нь эрсдэлтэй нөхцөл байдал үүсгэх учраас хоёр турбогенератороо шинээр захиалж, үйлдвэрлүүлж, шинээр авч угсрах нь зүйтэй гэдэг шийдэл дээр эцэслэсэн. Хэдийгээр бага зэрэг хугацаа орох ч бүгдийг шинээр авах нь зүйтэй юм.

Энэ хоёр турба генераторыг худалдан авахад улсын төсөв дээр 50-ын турбин дээр 60 тэрбум, 30-ын турбин дээр 30 тэрбум төгрөг тусгасан. Энэ санхүүжилт 2025, 2026 оны төсөв дээр дамжин тавигдахаар суусан. 2025 оны төсөв дээр 20 тэрбумыг тавьсан бөгөөд энэ санхүүжилтээр захиалгаа өгөөд ажлаа эхлүүлэх бүрэн боломжтой.

Есдүгээр турбогенераторыг бүрэн сэргээх, актлагдсан байсан 25 МВт-ын хүчин чадалтай долдугаар турбогенераторыг шинэчлэх ажлыг 2026 оны арваннэгдүгээр сарын 1-ээс өмнө ашиглалтад оруулах төлөвлөгөөтэй байна.