АНУ-ын Ерөнхийлөгч Дональд Трамп энэ мягмар гарагт АНУ-аас Украинд хамгаалалтын зэвсэг нийлүүлэхийг зөвшөөрсөн бөгөөд Москвагийн эсрэг шинэ хориг арга хэмжээ авч магадгүй гэж мэдэгдэв. 

Сонгуулийн үеэр бүрэн эрхээ хэрэгжүүлж эхлээд нэг хоногийн дотор дайныг дуусгана гэж амлаж байсан Трамп одоогоор энэ амлалтаа биелүүлж чадаагүй л байна. Түүний засаг захиргааны энхийн хэлэлцээр хийх оролдлогууд ч бүтэлгүйтсэн.

Мягмар гарагт Цагаан ордонд болсон Засгийн газрын хуралдааны үеэр Трамп Путинд хандан бухимдлаа илэрхийлсэн байна. Тэрээр "Би Путинд сэтгэл дундуур байна. Одоогоор үүнийг л хэлж чадах байна" хэмээжээ. Тэрээр Орос, Украины цэргүүд мянга мянгаараа амиа алдаж байгааг онцлоод  "Путин бидэнд элдэв худал зүйл их ярьдаг... Үргэлж л найрсаг харагддаг ч тэр нь үнэ цэнгүй зүйл гэдэг нь тодорхой болсон" гэж хэлжээ.

Трамп мөн ОХУ-ын эсрэг хатуу хориг тавих тухай Сенатын шинэ хуулийн төслийг дэмжих эсэхээ судалж байгаагаа мэдэгдэв. Энэхүү хуулийн төслийг Бүгд Найрамдах намын сенатор Линдси Грэхам (Өмнөд Каролина) болон Ардчилсан намын сенатор Ричард Блументаль (Коннектикут) нар санаачилсан бөгөөд Оростой худалдаа хийж буй бусад улсуудыг ч шийтгэж, Оросын нефть, хий, уран болон бусад бүтээгдэхүүнд 500 хувийн тариф ногдуулах агуулгатай юм.

Түүнчлэн Трамп Украинд илүү олон хамгаалалтын зэвсэг илгээхээ амласан бөгөөд мягмар гарагт тэрээр энэ шийдвэрээ баталгаажуулсан. Украины Ерөнхийлөгч Володимир Зеленский мягмар гарагт АНУ-тай цэргийн тусламжийн хүрээнд харилцаагаа өргөтгөх үүрэг өгсөн тухайгаа зарлаж, ялангуяа агаарын довтолгооноос хамгаалах системийн чухлыг онцолсон.

Зеленский барууны холбоотнууддаа Орост илүү хатуу хориг тавихыг удаа дараа уриалж, энэ нь гал зогсоох хэлэлцээрийн эхлэл болох ёстой гэж үздэг. АНУ-ын Батлан хамгаалах яамны зүгээс зарим чухал зэвсгийн нийлүүлэлтийг түр зогсоох шийдвэр гаргасан нь Украины эсэргүүцэлтэй тулгарсан бөгөөд Киев энэ шийдвэр нь Оросын агаарын цохилт, газар дээрх давшилтад тэсвэрлэх чадавхийг сулруулна хэмээн анхааруулсан юм.