УИХ-ын чуулганы нэгдсэн хуралдаанаар 2025 оны төсвийн тухай хуульд нэмэлт, өөрчлөлт оруулах тухай хуулийн төслийг дагалдуулан өргөн барьсан “Алт-3” аяныг хэрэгжүүлэх УИХ-ын тогтоолын төслийг баталлаа. Хуралдаанд оролцсон гишүүдийн олонх буюу 53 гишүүн "Алт 3" аяныг хэрэгжүүлэхийг дэмжиж шийдвэрлэлээ.

"Алт-3" аяныг хэрэгжүүлэх УИХ-ын тогтоол батлагдсанаар Монгол Улсад батлагдсан 3 тонноос дээш нөөцтэй алтны ордуудыг эдийн засгийн эргэлтэд оруулах ажил эхлэх юм. Ингэхдээ Засгийн газар тусгай хамгаалалтад байгаа нэр бүхий алтны үндсэн ордыг эргэлтэд оруулах асуудлыг УИХ-д оруулж ирэхийг Ерөнхий сайд Г.Занданшатарт үүрэг болгов. Өөрөөр хэлбэл, эдийн засгийн эргэлтэд оруулах алтны орд нь тусгай хамгаалттай газар нутагт хамаарах бол заавал УИХ-аар хэлэлцэн шийдвэрлүүлэх юм.

Дашрамд дурдахад, Монгол Улсын ашигт малтмалын нөөцийн нэгдсэн бүртгэлд бүртгэгдсэн 105 ордын 572.2 тонн нөөцөөс 347.1 тонн алтны нөөц бүхий 82 алтны үндсэн ордын хүчинтэй тусгай зөвшөөрөл бүртгэлтэй байгаа аж.

 Эдгээрээс 14 нь өнөөдрийн байдлаар тодорхой хэмжээнд ашиглагдаж байгаа бөгөөд 228.7 тонн нөөц бүхий 68 орд ямар нэг хуулийн хориглолт байхгүй хэр нь эдийн засгийн эргэлтэд ороогүй байна гэсэн судалгааны дүн гарсан байна.