УДБЭТ-ын уран бүтээлчид өнөөдөр хэвлэлийн хурал зарлаж, уран сайхны удирдагчтайгаа цаашид хамтран ажиллах боломжгүй болсноо мэдэгдлээ. Үүнтэй холбогдуулан тэд энэ жилийн Үндэсний их баяр наадмын концертод оролцохгүй байх шийдвэр гаргасан байна.

Уран бүтээлчдийн хэлж байгаагаар энэ асуудал саяхнаас үүссэн асуудал биш. Харин дотооддоо хэлэлцэн, асуудлыг эв зүйгээр шийдэхээр удаан хугацаанд оролдсон байна. Тэд 2024 оны нэгдүгээр сараас хойш “уран бүтээлчдээ сонсдог байя, үг хэлдэг хүмүүсийг шахахгүй байя” хэмээн шаардлага тавьж, удирдлагадаа хандсаар иржээ. Гэвч энэ бүхэн биелээгүй тул ийм шийдвэр гаргахад хүрсэн гэдгээ илэрхийлэв.

Мөн тэд театрын уран сайхны бодлого ганцхан хүний үзэмжээр явагдаж, дүр сонголт, уран бүтээлд оролцох асуудлыг цөөн хүн шийддэг болсон гэв. Үүний улмаас театрын дотоод уур амьсгал муудаж, уран бүтээл хийх боломж нь хязгаарлагдаж байгаа юм байна. Уран сайхны зөвлөлөөс хараат бус байх ёстой бодлого алдагдаж, театр түрээсийн танхим болон хувирч, гаднын тоглолтууд уран бүтээлийн ажлыг тасалдуулдаг, байгууллагын бүтэц, зохион байгуулалтад уран бүтээлчдээс нууцалсан шийдвэрүүд гарсан тухай мэдээллээ.

Тухайлбал, 2024 оны тавдугаар сарын 21-нд Соёлын сайд Ч.Номин шинэ бүтэц баталсан ч энэ талаар уран бүтээлчид гуравхан хоногийн өмнө л мэдсэн байна. Шинэ бүтцээр удирдлагын орон тоог нэмэгдүүлж, дарга нарын суудалд уран бүтээлч бус хүмүүс томилогдсон нь дотоод хагарлыг нэмэгдүүлж, театрын уран бүтээлчид хэд хэдээрээ хуваагдсан байна. Түүнчлэн тэд Дугараа овогтой Алтанхуяг гэгчийг УДБЭТ-ын захирлын түр орлон гүйцэтгэгчээр томилсныг эрс эсэргүүцэж байгаагаа илэрхийлсэн юм. Тэдний хэлж буйгаар уг хүн төрийн албанд томилогдох шаардлагын 40 хувьд ч хүрэхгүй, хууль зөрчин томилогдсон бөгөөд багш нь байсан Г.Ганцэцэгийг уран сайхны удирдаачаар, төрсөн дүүгийнхээ “Улаанбаатар балет” компанид байгууллагын хөрөнгөөс худалдан авалт хийсэн зэрэг ашиг сонирхлын зөрчил бүхий үйлдлүүд хийсэн хэмээн мэдэгдлээ. Мөн багийнх нь найз Батхүрэлийг театрын Ерөнхий менежерээр томилсон нь ч шүүмжлэл дагуулж байгаа юм. Түүнчлэн уран бүтээлчдийн саналыг огт сонсдоггүй, хамт олныг үл тоомсорлодог удирдлагын хандлага давамгайлж байна гэлээ. Театрын санхүүгийн нөхцөл байдал хүндэрсэн ч хэвлэл мэдээллийнхэнтэй 18 сая төгрөгийн хаалттай гэрээ байгуулсан гэх мэдээлэл ч байгаа юм.

Тиймээс уран бүтээлчид уран сайхны удирдагч Г.Ганцэцэг, захирлын үүргийг түр орлон гүйцэтгэгч Д.Алтанхуяг нарын үйл ажиллагаа нь байгууллагын соёл, уран бүтээлчдийн ажиллах нөхцөлд ноцтой зөрчил үүсгэж байгаа тул албан тушаалаас нь чөлөөлөхийг Соёлын яам болон Засгийн газарт албан ёсоор шаардаж, энэхүү асуудлыг 2025 оны долдугаар сарын 9-ний өдрийн 15:00 цаг хүртэл шийдвэрлэхгүй бол Улсын баяр наадмын тоглолтод оролцохгүй хэмээн мэдэгдээд байна.