УИХ-ын чуулганы хуралдаанаар 2025 оны төсвийн тодотголыг хэлэлцэх үеэр Боловсролын сайдын багцад байсан 2.6 тэрбум төгрөгийг хасаж, Цахим хөгжил, инноваци, харилцаа холбооны сайдын багц руу шилжүүлсэн юм. Энэ шийдвэрийн улмаас нийслэлийн хэмжээнд энэ онд тэтгэвэрт гарах 117 багш хуульд заасан нэг удаагийн тэтгэмжээ авч чадахгүй болох нөхцөл үүссэн нь олон нийтийн бухимдлыг төрүүлсэн юм.

117 багшийн тухайд тэд олон жилийн турш боловсролын салбарт үр бүтээлтэй ажилласан, өндөр ачаалалтай нөхцөлд ажиллаж ирсэн тул хуульд заасны дагуу 36 сарын цалинтай тэнцэх хэмжээний тэтгэмж авах ёстой юм. Тэгвэл өнөөдөр Боловсролын яам албан ёсны цахим хуудсаараа дамжуулан энэ асуудалд тайлбар өглөө.

Боловсролын сайд П.Наранбаяр өөрийн цахим хуудсаар мэдэгдэхдээ “Нийслэлийн Боловсролын газрын 2025 оны төсөвт 117 багш, ажилтны тэтгэмж болох 2.6 тэрбум төгрөгийн санхүүгийн эх үүсвэр багтсан байсан. Хэдий УИХ-ын гишүүн Г.Ганбаатарын гаргасан саналаар уг төсөв хасагдсан ч багш нарын тэтгэмжийг Боловсролын сайдын багцаас гаргаж, цаг хугацаанд нь бүрэн олгоно гэдгийг хариуцлагатайгаар мэдэгдэж байна” гэсэн юм.