Сүүлийн үед улаанбурхан өвчний тархалт улсын хэмжээнд эрс нэмэгдсэнтэй холбогдуулан Улсын Онцгой комиссын 2025 оны 01 дүгээр тогтоол болон Эрүүл мэндийн сайдын А/249 дүгээр тушаалаар Эрүүл мэндийн салбарыг өндөржүүлсэн бэлэн байдлын зэрэгт шилжүүлсэн юм. Энэ хүрээнд 10 сартайгаас 15 насны товлолын бүрэн тунд хамрагдаагүй хүүхдүүдийг нөхөн дархлаажуулалтанд, 6-8 сартай буюу товлолын нас болоогүй хүүхдүүдийг нэмэлт тунгаар дархлаажуулж байна.
Дархлаа сайн байх нь олон төрлийн халдварт өвчнөөс сэргийлэх чухал нөхцөл болдог. Хүүхэд эхээс төрөхдөө тодорхой хэмжээний дархлалтай төрдөг ч энэхүү дархлаа богино хугацаанд алдагдаж, хүүхэд 1 нас хүрэх үед үндсэндээ бүрэн арилдаг байна. Харин найдвартай, тогтвортой дархлаа тогтоох арга нь дархлаажуулалт юм. Дархлаажуулалт гэдэг нь халдварт өвчнөөс урьдчилан сэргийлэх зорилгоор вакцин буюу дархлаажуулах бэлдмэл тарих эмнэлгийн арга хэмжээг хэлдэг.
Дархлаажуулалтын дараа хүүхдийн биед тодорхой шинж тэмдгүүд илрэх нь хэвийн үзэгдэл бөгөөд энэ нь вакцин хийсний дараах хариу урвал юм. Үүнд вакцин хийсэн хэсэгт улайх, өвдөх, хавдах, хөндүүрлэх. Бага зэрэг халуурах, тууралт гарах. Эдгээр шинж тэмдгүүдийг дархлаажуулалтын дараах урвал гэж нэрлэдэг. Урвалыг хөнгөн ба хүнд хэлбэрээр ангилдаг байна. Дархлаажуулалтын дараа ихэнх хүүхдэд зөвхөн хөнгөн урвал илэрдэг бөгөөд энэ нь аюултай биш юм.
Дархлаажуулалтад хамрагдахаар очихдоо анхаарах зүйлс
1. Дархлаажуулалтыг товлолын дагуу, эрүүл мэндийн байгууллагаас тогтоосон хугацаанд харьяа өрхийн эмнэлэгт очиж хийлгэнэ.
2. Хүүхдийн сэргийлэх тарилгын карт, эх хүүхдийн эрүүл мэндийн дэвтрийг авч очих
3. Эмчид заавал үзүүлж, ямар вакцины хэд дэх тунг хийх талаар дэвтэрт тэмдэглүүлэх
4. Эмчид хүүхдийн биеийн байдал, зовуурь байгаа эсэх болон урьд өмнө өвчилсөн өвчнүүд харшлын талаар дэлгэрэнгүй, үнэн зөв мэдээлэх
5. Эмчээс дархлаажуулалтын дараах урвал, хүндрэл хүүхдийн эрүүл мэндтэй холбоотой бусад асуудлаар чөлөөтэй зөвлөгөө авах
6. Сувилагч вакцины тухай дараах мэдээллийг танилцуулна. Вакцины нэр, үйлдвэрлэсэн улс, Он болон хэддэх тун болохыг хэлнэ. Мөн хаана тарьж буйг танилцуулна. Үүнд эцэг эх давхар хяналт тавих үүрэгтэй.
7. Эмчид үзүүлсэн өдөртөө вакцинаа хийлгэнэ.
Вакцин тариулахын өмнө халуун бууруулах болон өвчин намдаах лаа, эм хэрэглэхгүй байх хэрэгтэй. Мөн хүүхдийг улиралд тохируулан хувцаслаж, хөхүүл бол сайн хөхүүлэх, нэмэгдэл хоолонд орсон бол насанд нь тохирсон хоол өгөн, унтуулж амраах шаардлагатай байна. Улаанбурханы эсрэг дархлаажуулалт өрхийн эрүүл мэндийн төвүүд дээр ажлын өдрүүдэд 08:30–21:00 цаг, амралтын өдрүүдэд 10:00–18:00 цаг хүртэл ажиллаж байгаа юм.
