УИХ-ын чуулганы хуралдаанаар Монгол Улсын 2025 оны төсвийн тодотголын гурав дахь хэлэлцүүлгийг хийх үеэр Боловсролын сайдын багцад байсан 2.6 тэрбум төгрөгийг хасаж, Цахим хөгжил, инноваци, харилцаа холбооны сайдын багц руу шилжүүлжээ. Үүний улмаас энэ онд тэтгэвэртээ гарах 117 багш хуульд заасан нэг удаагийн тэтгэмжээ авч чадахгүй болсон байна.

Тодруулбал, эдгээр багш нар 36 сарын цалинтай тэнцэх хэмжээний нэг удаагийн тэтгэмж авах ёстой байсан юм. Гэвч уг мөнгийг сайд Э.Батшугарын багц руу шилжүүлснээр тэтгэмж өгөх боломжгүй болгов. Төсвийн тодотголын гуравдугаар хэлэлцүүлэг аль хэдийн батлагдсан тул одоо уг өөрчлөлтийг эргүүлэн засах боломжгүй юм.

Энэ талаар УИХ-ын дэд дарга Б.Пүрэвдорж “Ардын намын сайд нар нэгнийхээ төсвийг нөгөө рүү нь шилжүүлсэн байна лээ” гэж мэдэгдсэн бол сайд Э.Батшугар “Намайг мэдэхгүй байхад 2.6 тэрбум төгрөгийг миний багц руу шилжүүлсэн байсан. Яагаад ингэснийг ойлгоогүй. Ганбаатар гишүүн санал гаргасан ч Төсвийн байнгын хороо дэмжээгүй. Гэтэл УИХ-ын чуулган дээр санал хураахад дэмжээд баталсан. Би юу болсныг мэдээгүй” гэж тайлбар өгчээ.

Боловсролын салбарт олон жил ажиллаж, өндөр ачаалалтай нөхцөлд зүтгэсэн багш нарыг хохироосон энэ үйлдэлд олон нийт дургүйцэж байгаа юм. Боловсролын сайдын төсвийг танаж, багш нарын тэтгэмжийг үгүй хийсэн нь зарчимгүй шийдвэр хэмээн шүүмжлэл дагуулаад байна.