Дэлхийн хамгийн том олон талт уур амьсгалын сан болох Уур амьсгалын ногоон сангаас ядуу буурай орнуудыг дэлхийн дулаарлын эсрэг хариу арга хэмжээ авахад нь дэмжлэг үзүүлэх зорилгоор түүхэндээ хамгийн том хэмжээний хөрөнгө оруулалтыг хийхээр болж, гэрээ хэлцлээ хурдасгахаар төлөвлөж байгаагаа мэдэгдлээ.
Энэ долоо хоногт АНУ зэрэг хувь нийлүүлэгч орнуудын баталсан шийдвэрийн дагуу тус сан Ази, Африк тивд төвлөрсөн 17 төсөлд нийт 1.2 тэрбум ам.доллар зарцуулахаар болсон байна. Энэхүү шийдвэр нь хөгжлийн тусламж буурч, улс төрийн нөхцөл байдал хурцдаж буй үед гарч байна гэж хэлж болно.
Эдийн засгийн хамтын ажиллагаа, хөгжлийн байгууллага (OECD)-ийн зургаадугаар сарын тайланд дурдсанаар, 2024 онд 9 хувиар буурсан албан ёсны хөгжлийн тусламж 2025 онд дахин 17 хувиар буурах төлөвтэй байгаа юм. Үүнд Ерөнхийлөгч Дональд Трампын АНУ-ын тусламжийн таналт голлон нөлөөлж байна.
GCF-ийн хамтран даргалагч Сейни Нафо хэлэхдээ:
"Нэгдсэн уур амьсгалын үйл ажиллагаа хэзээ хэзээнээс илүү чухал байгаа энэ үед GCF үүргээ биелүүлэхийн төлөө идэвхтэй ажиллаж байна" гэжээ.
GCF-ийн шинээр зарцуулах хөрөнгийн багцад дараах томоохон төсөл багтжээ:
227 сая ам.доллар — 10 улсад ногоон бондын зах зээлийг өргөжүүлэх санаачилга. (Ногоон бондын зах зээл нь уур амьсгалын өөрчлөлтийг бууруулах эсвэл байгаль орчинд эерэг нөлөө үзүүлэх төслүүдийг санхүүжүүлэх зорилготой.)
200 сая ам.доллар — Энэтхэгийн Ногоон Санхүүгийн Хөтөлбөр-т, сэргээгдэх эрчим хүч болон эрчим хүчний хэмнэлтэд зориулагдана.
150 сая ам.доллар — Зүүн Африкт хүнсний системийг дэмжихэд, ойролцоогоор 18 сая хүнд тусламж үзүүлэх зорилготой.
Эдгээр шинэ төслүүдийг багтааснаар GCF-ийн хөрөнгө оруулалтын нийт хэмжээ 133 улсад нийт 18 тэрбум ам.долларт хүрэх юм. Өнөөг хүртэл орнууд тус санд 29.9 тэрбум ам.доллар амлаж, 21 тэрбумыг нь төлөөд байна.
Уур амьсгалын Ногоон сангийн санхүүжилтээр НҮБ-ын Хөгжлийн Хөтөлбөр, Байгаль орчин, аялал жуулчлалын яам, Хүнс, хөдөө аж ахуй, хөнгөн үйлдвэрийн яам хамтран “Монгол орны хөдөөгийн иргэдийн дасан зохицох чадамж болон эрсдэлийн менежментийг сайжруулах нь” (АДАПТ) төслийг хэрэгжүүлж байгаа билээ. Уг төсөл байгалийн нөөцөөс хамааралтай малчдын уур амьсгалын өөрчлөлтөд дасан зохицох чадамжийг сайжруулах зорилгоор Ховд, Завхан, Дорнод, Сүхбаатар аймагт 2021-2028 онд хэрэгжих юм.
Төслийн зорилтот 4 аймагт уур амьсгалын эрсдэлд дасан зохицох чадавхыг нэмэгдүүлэх олон ажил амжилттай хэрэгжиж, малчид, төрийн байгууллагууд, иргэдийн оролцоо бодит үр дүнд хүрсээр байна.
