"Хаалга бүхэнд хүрч, хүүхэд бүрийг хамгаалъя" дархлаажуулалтын арга хэмжээ орон даяар хэрэгжиж эхэллээ. Уг арга хэмжээг Монгол Улсын Засгийн газар, Эрүүл мэндийн яам хамтран зохион байгуулж байна. Үүний гол зорилго нь хүүхэд бүрийг халдварт өвчнөөс урьдчилан сэргийлэх, дархлаажуулалтад бүрэн хамруулах нь юм. Арга хэмжээний нээлтийн үеэр Монгол Улсын Шадар сайд, Эрүүл мэндийн сайд болон холбогдох мэргэжлийн байгууллагын төлөөллүүд оролцож мэдээлэл өглөө.

Эрүүл мэндийн сайд Ж.Чинбүрэн: Сургууль, цэцэрлэг амарсан энэ үед олон хүн өвчний тархалт буурна гэж найдаж, сэтгэл амарч болохгүй. Өнөөдрийн байдлаар өвчлөлийн зураглалыг харвал 10-15 насны хүүхдүүд биш, харин 17 болон түүнээс дээш насны залуучуудын дундах халдварын тоо эрс нэмэгдэж эхэлсэн байна. Харамсалтай нь тэдгээр хүмүүсийн зарим нь улаанбурхан өвчний эсрэг вакцины хоёр тунгаа бүрэн хийлгээгүй, дархлаагүй 2 хүртэлх насны нярай, бага насны хүүхдүүдэд халдвар тарааж байна. Үүний улмаас бага насны хүүхдүүдийн биеийн байдал хүндэрч, эмнэлэгт хэвтэн эмчлүүлэх тохиолдол нэмэгджээ. Иймд бид ирээдүйн эзэд болсон бяцхан үрсээ өвчинд золиосолж хэрхэвч болохгүй. Удахгүй үндэсний их баяр наадам болно. Бид эрүүл, аюулгүй, тайван орчинд дэнж хотойтол сайхан наадамлахын тулд эрсдэлээс урьдчилан сэргийлэх ёстой. Мөн вакцины талаар худал ташаа мэдээлэл тарааж, хүмүүсийг эргэлзүүлэх нь хувь хүний үзэл бодол мэт боловч үнэн хэрэгтээ олон хүний эрүүл мэндэд хохирол учруулж буй ноцтой асуудал юм. Вакцинд хамрагдаагүй хүмүүс өвчнийг тарааж, түүний хохирогч нь бага насны хүүхдүүд болж байна. Иймд энэ бол зөвхөн хувь хүний сонголт бус, нийт нийгмийн хариуцлагын асуудал гэдгийг ухамсарлах хэрэгтэй.