-Монголбанк эхний хагас жилд 5.9 тонн алт худалдан авлаа-
Монголбанк 2025 оны зургадугаар сард 1587.4 кг алт худалдан авч, оны эхнээс өссөн дүнгээр 5.9 тонн үнэт металл худалдан аваад байна. Энэ нь өмнөх оны мөн үетэй харьцуулбал 24.3 хувиар буурсан үзүүлэлт юм.
2025 оны сүүлийн хагаст алт тушаалт нэмэгдэх хүлээлт үүсээд байна. Учир нь, 2025 оны төсвийн тодотголтой хамт Алт-3 аяныг хэрэгжүүлэх УИХ-ын тогтоолын төслийг өргөн бариад байгаа юм. Уг тогтоолын төсөл батлагдсанаар 3 тонноос дээш нөөцтэй алтны ордуудыг эдийн засгийн эргэлтэд оруулах ажил эхэлнэ. Гурван тонноос дээш нөөцтэйг үндсэн орд гэж нэрлэдэг.
Мөн тогтоол батлагдсанаар хайгуул болон ашиглалтын тусгай зөвшөөрөл олгох процессыг хөнгөвчлөх, алтны төслүүдэд шинэ хөрөнгө оруулалт татах чиглэлд Аж үйлдвэр, эрдэс баялгийн яам бодлогоор дэмжиж ажиллах боломжийг нээх аж.
Алт-3 аяны хүрээнд алт тушаалт жил бүр 10 тонноор нэмэгдэх хүлээлттэй байна
Алт-3 аяны хүрээнд 2025 оны сүүлийн хагаст алт тушаалт нэмэгдэж, оны эцэст 20 тонн хүрэх боломжтой гэж салбарынхан үзэж байгаа аж. Хэрвээ Монгол Улс жилдээ 20 тонн алт худалдан авбал гадаадын валютын албан нөөц 2 тэрбум ам.доллараар нэмэгдэх боломжтой юм.
Төсвийн орлогыг бүрдүүлдэг нүүрсний үнэ дэлхий зах зээл дээр унаж байгаа ч үнэт металлын үнэ байнга өсөж буй. Тиймээс Монгол Улс алтны ханш өсөж байгаа үеийг ашиглан алтны олборлолтоо нэмэгдүүлэх зорилго тавиад байна. УИХ-ын тогтоолын төсөл батлагдсаны дараа ТЭЗҮ нь бэлэн алтны үндсэн ордуудыг эдийн засгийн эргэлтэд оруулах бөгөөд шаардлагатай бол Монголбанкнаас аж ахуйн нэгжүүдэд эргэлтийн хөрөнгийн хөнгөлөлтэй зээл олгох асуудлыг судалж, шийдвэрлэх юм байна.
Эхлээд алтны 5 том лицензийг эдийн засгийн эргэлтэд оруулах төлөвлөгөөтэй байгаа бөгөөд ингэхдээ нөхөн сэргээх шаардлагыг өмнөхөөс өндөр түвшинд тавьж ажиллана гэдгийг Аж үйлдвэр, эрдэс баялгийн сайд Г.Дамдинням онцолсон. Урьдчилсан тооцоогоор Алт-3 аяныг 2028 он хүртэл амжилттай хэрэгжүүлснээр Монголбанкинд тушаах алтны хэмжээ жил бүр 10 тонноор нэмэгдэх боломжтой гэж үзжээ.
Монголбанкны үнэт металл худалдан авах үнийг дэлхийн зах зээл дээрх үнээр тогтоодог. 2025 оны зургадугаар сард алт худалдаж авах дундаж үнэ 385,320.36 төгрөг байжээ.
