“Улаанбаатар метро” төсөл нь Их Британийн төмөр замын салбарынхны анхаарлыг татаж, хоёр улсын хооронд хамтын ажиллагааны шинэ хуудас нээгдэж буйг Английн хэвлэл мэдээллийн байгууллагууд онцолжээ.
Их Британийн Уорикшир мужид болсон "Rail Live 2025" арга хэмжээнд Улаанбаатар метро төслийн захирал Т.Мөнхдалай, Архитектор Х.Елик нар төслөө танилцуулж /2025.06.18/, Их Британийн болон дэлхийд тэргүүлэгч компаниуд, мөн санхүүжилтийн болон зөвлөх үйлчилгээний топ компаниудад хамтран ажиллах боломжийн талаар мэдээлэл өгч, хэлэлцүүлэв.
Их Британи нь төмөр замын салбарт технологи, шинэчлэлийг амжилттай хэрэгжүүлсэн туршлагаараа дэлхийд тэргүүлэгч улс бөгөөд тэр дундаа аюулгүй байдлын стандарт, дэвшилтэт инженерийн шийдэл, тогтвортой хөгжлөөр танигдсан байдаг. Иймд Лондон хотын метроны бүтээн байгуулалт болон дэд бүтцийн томоохон төслүүдийг амжилттай хэрэгжүүлсэн Alstom UK, CAF UK, Hitachi, Pandrol, Ricardo Rail, Arup зэрэг компанийн төлөөлөлтэй уулзаж, хөдлөх бүрэлдэхүүний нийлүүлэлт, төмөр замын системийн интеграцчилал, депогийн менежмент, өртөөний байгууламжийн технологи (PSD болон SCADA систем г.м)-той танилцан туршлага судалсан байна. Улаанбаатар метро төслийн талаар Их Британийн Rail Business Daily, Ground News, Railway News, Rail Live зэрэг томоохон хэвлэлүүд онцолсон байна.
Тус нийтлэлүүдэд дурдсаныг тоймловол, “Улаанбаатар метро төслийн хүрээнд Толгойтоос Амгалан чиглэлд 15 өртөө, 1 депо бүхий 19.4 км урттай метроны нэгдүгээр шугамыг 2024-2030 онд хэрэгжүүлэхээр төлөвлөн ажиллаж байна. Одоогоор төслийн техник, эдийн засгийн үндэслэл (ТЭЗҮ), эх загвар зураг батлагдсан бөгөөд бүтээн байгуулалтын ажлын гүйцэтгэгч сонгон шалгаруулах үйл ажиллагаа, төслийн байгаль орчин, нийгмийн нөлөөллийн үнэлгээ боловсруулах ажлууд хийгдэж байна.
Төсөл хэрэгжсэнээр иргэд автобусаар 45 минут явах зайг 15 минутад туулах боломж бүрдэхээс гадна авто замын сүлжээний хөдөлгөөний эрчим 10 хувиар сайжрах зэрэг нийгэм, эдийн засаг, байгаль орчинд үзүүлэх эерэг үр нөлөө бий болно. Тус төсөл нь зөвхөн нийтийн тээврийн салбарт дэд бүтцийн шинэчлэл хийгээд зогсохгүй олон улсын шилдэг туршлага, технологийг Монгол Улсад нэвтрүүлж, цаашдын томоохон төсөл, хөрөнгө оруулалтын хамтын ажиллагааны жишиг болох чухал ач холбогдолтой төсөл юм” хэмээн тодотгожээ.
Дашрамд дурдахад, Нийслэлийн Засаг даргын Тамгын газар нь 2025 оны 05 дугаар сарын 08-ны өдөр Их Британи Умард Ирландын Нэгдсэн Хаант Улсын Худалдаа, бизнесийн асуудал эрхэлсэн Төрийн нарийн бичгийн дарга (UK Export Finance буюу Их Британийн Экспортын Санхүүжилтийн Агентлагаар дамжуулан)-тай хамтын ажиллагааны “Санамж бичиг” байгуулсан. Тус Санамж бичгийн хүрээнд Улаанбаатар метро төсөл болон нийслэлийн хэрэгжүүлж буй бусад төслүүдэд UK Export Finance буюу Их Британийн Экспортын Санхүүжилтийн Агентлагаас санхүүжилтийн баталгаа гаргаж, дэмжлэг үзүүлэн ажиллах юм. Ингэснээр ИБУИНХУ болон Монгол Улс хоорондын хамтын ажиллагаа дараагийн түвшинд шилжихэд чухал алхам болно.
