Урин дулаантай зэрэгцэн иргэдийн аялал, зугаалга нэмэгддэг тул улаанбурхан зэрэг халдварт өвчнөөс сэргийлэх нь чухал юм. Аялалд явахдаа хамт явах хүмүүсийн вакцинжуулалт, орчны агааржуулалт, эрүүл ахуйг нягтлах хэрэгтэй. Улаанбурхан хамгийн их бүртгэгдэж буй улсуудад Орос, Энэтхэг, Казахстан зэрэг улс нь багтаж байна. Саяхан манай улс өндөржүүлсэн бэлэн байдалд шилжиж, өрхийн эмнэлгүүд уртасгасан цагаар ажиллаж байгаа бөгөөд иргэд E-Mongolia аппликэйшнаар вакцинд хамрагдсан эсэхээ шалгаж, харьяа өрхийн эмнэлэгтээ дархлаажуулалтад хамрагдах боломжтой юм. Энэ талаар ХӨСҮТ-ийн Халдварт өвчний тандалт судалгааны албаны тасгийн эрхлэгч Н.Сувдмаа тайлбар хүргэлээ.
Тэрээр “Манай улс эрс тэс уур амьсгалтай. Урин дулаан цаг ирэхтэй зэрэгцэн иргэд дотооддоо болон гадаад улс орон руу аялж, зугаалах нь нэмэгддэг. Аялах үедээ эрүүл мэндийн хувьд анхаарах чухал зүйлсийн нэг нь халдварт өвчнөөс урьдчилан сэргийлэх явдал юм. Ялангуяа улаанбурхан өвчний тохиолдол зарим улс оронд буурахгүй байгаа энэ үед илүү аюулгүй байдлаа сахих хэрэгтэй.
Хэрвээ та гэр бүл, найз нөхөд, хамт олонтойгоо аяллаар явах гэж байгаа бол хамт явах хүмүүсийн дунд улаанбурхан өвчнөөр өвдөж байсан хүн байгаа эсэхийг мэдэх, мөн вакцинд хамрагдсан эсэхийг нягтлах нь зүйтэй. Зуслангийн орчинд ажиллах багш, ажилтнууд ч мөн адил улаанбурханы эсрэг вакциндаа заавал хамрагдсан байх шаардлагатай. Аяллын явцад орчны эрүүл ахуйг хангах нь маш чухал. Ялангуяа зочид буудал, амралтын газар, зуслангийн байр зэрэгт өрөө тасалгааны агааржуулалт сайн, цэвэрхэн, агаар сэлгэлт сайтай эсэхийг шалгах хэрэгтэй. Энэ нь халдварт өвчнөөс сэргийлэх чухал арга хэмжээний нэг юм.
Мөн гадаад руу аялах гэж байгаа бол тухайн улс оронд аль төрлийн өвчлөл зонхилж байгааг урьдчилан судалж, шаардлагатай мэдээллийг цуглуулах нь зүйтэй. Ингэснээр та тухайн орчин нөхцөлд юуг анхаарах хэрэгтэйг мэдэж, бэлтгэлтэй байх боломжтой. Дэлхийн хэмжээнд ямар халдварт өвчин тархаж байгаа талаар Халдварт өвчин судлалын үндэсний төв цаг алдалгүй мэдээлэл түгээдэг. Тиймээс та албан ёсны, найдвартай эх сурвалжаас мэдээлэл авах хэрэгтэй юм. Сүүлийн үед улаанбурхан өвчний тархалт өндөр хэвээр байгаа улс орнуудын тоонд Орос, Энэтхэг, Казахстан болон Европын зарим орон багтаж байна. Эдгээр улс оронд өвчлөлийн тоо тогтмол өндөр байгаа тул тус улс руу аялах гэж байгаа иргэд илүү анхааралтай байх шаардлагатай. Иргэд ямар нэг мэдээлэлд хандахдаа шүүлтүүртэй, нягтлан шалгаж үздэг байх нь чухал. Зөв мэдээлэл авч, бусдад түгээх нь өвчнөөс урьдчилан сэргийлэхэд маш чухал ач холбогдолтой.
