Уоррен Баффет энэ баасан гарагт “Berkshire Hathaway” компанийн 6 тэрбум ам.долларын B ангиллын хувьцааг Билл ба Мелинда Гейтсийн сан болон гэр бүлийнхээ дөрвөн буяны байгууллагад хандивлалаа. Энэ нь түүний өнөөг хүртэл хийсэн хамгийн том жил бүрийн хандив болж байна.

Баффет энэ удаад нийт 12.36 сая "Berkshire Hathaway" компанийн B ангиллын хувьцаа хандивласан бөгөөд нийт хандивынхаа хэмжээг 60 тэрбум ам.доллараас давуулжээ. Хандивын ихэнхийг Гейтсийн санд, үлдсэнийг нь анхны эхнэрийнх нь нэрэмжит сан болон хүүхдүүдийнх нь удирддаг гурван буяны санд өгсөн байна.

Баффет одоо ч Berkshire-ийн 13.8 хувийг эзэмшиж байгаа бөгөөд хөрөнгийнх нь хэмжээ хандивын дараа 152 тэрбумаас буурч, дэлхийн зургаа дахь баян хүн болжээ.

Өдгөө 94 настай Баффет 2006 онд хөрөнгөө хандивлаж эхэлсэн бөгөөд өнгөрсөн жил гэрээслэлээ шинэчилж, нас барсны дараа үлдэх хөрөнгийн 99.5 хувийг хүүхдүүдийнх нь хяналт дор ажиллах буяны санд шилжүүлэхээр заасан байна.

Түүний гурван хүүхэд тус хөрөнгийг дараагийн 10 жилийн дотор хамтран шийдэж, хандивлах ёстой юм. Түүний удирддаг Berkshire Hathaway компани нь 1.05 их наяд ам.долларын үнэлгээтэй, 200 орчим бизнес, томоохон хувьцаа эзэмшдэг корпорац юм.