Хятадын Хунань муж дахь Батлан хамгаалахын үндэсний их сургууль шумуулын хэмжээтэй, илрэхгүйгээр ажиглалт хийх чадвартай жижиг дроныг танилцуулжээ.

Энэхүү шинэ төхөөрөмж ердөө 2 см урт, 3 см өргөн, 0.2 граммаас бага жинтэй аж. Хятадын төв телевизийн бичлэгт судлаачийн хурууны завсар багтаж байгаа нь тод харагдаж байв. Энэ төрлийн микро робот тулааны талбар дээр мэдээлэл тандах зэрэг тусгай ажиллагаанд хамгийн тохиромжтой хэмээн тус их сургуулийн оюутан Лян Хэсиан Хятадын төв телевизэд ярьжээ.

Технологийн дэвшил нь мэдрэгч, батарей, бусад эд ангийг маш жижиг биед суурилуулах боломжийг бүрдүүлснээр дронууд улам бүр жижиг, хөнгөн, нарийн ажиллагаатай болсоор байна. Микро хэмжээтэй болсноор дронууд пуужингийн оронд ашиглах хямд хувилбар болохоос эхлээд аврах ажиллагааны гэх мэт олон зориулалттай болж буй. Гэвч нөгөө талаас хувийн нууц алдагдах болон гэмт хэрэгт ашиглагдах эрсдэл ч мөн бий болж байна.

Хэдийгээр энэ загвар нь микро төхөөрөмжийн хязгаарыг тултал шахаж байгаа ч ижил төстэй судалгаанууд дэлхийн бусад орнуудад мөн хийгдсээр байна. Жишээлбэл, Харвардын микророботикийн лабораторид бүтээгдсэн RoboBee хэмээх шавж хэлбэрийн робот нь хиймэл булчингуудаараа секундэд 120 удаа далавчаа дэвж нисэх чадвартай бөгөөд аврах ажиллагаа, хиймэл тоос хүртээх зэрэгт ашиглах боломжтой байна.

RAND корпорацын ахлах судлаач Тимоти Хийт The Telegraph-д өгсөн ярилцлагадаа “Хэрэв Хятад улс ийм жижиг дрон үйлдвэрлэх чадвартай бол тэд үүнийг тагнуул, ажиглалт, мэдээлэл цуглуулах ажиллагаанд ашиглах сонирхолтой байх нь гарцаагүй. Ялангуяа том дрон нэвтэрч чадахгүй хаалттай орон зайд ашиглах нь үр дүнтэй байж магадгүй” хэмээн ярьжээ.

Гэвч зарим шинжээчийн үзэж байгаагаар шумуулын хэмжээтэй дрон нь байлдааны талбарт ашиглагдах боломжийн хувьд хязгаарлагдмал ажээ.