ХӨСҮТ-өөс улаанбурхан өвчний тархалтын талаар мэдээлэл хийлээ. 

ХӨСҮТ-ийн Нэгжийн дарга Н.Сувдмаа: Улаанбурхан өвчний 10065 тохиолдол батлагдлаа. Үүнээс 8405 нь эдгэрч, эмнэлэгт 646 хэвтэж,  гэрээр 1014 хүүхэд эмчлүүлж байна. Харамсалтайгаар долоон хүүхэд эндсэн. Эмнэлэгт хэвтэн эмчлүүлж буй хүүхдүүдийн биеийн байдлын эрэмбэлбэл хөнгөн 65, дунд 538, хүнд 40, нэн хүнд гурав байна. Улсын хэмжээнд бүх аймаг болон Улаанбаатар хотод улаанбурхан өвчний тохиолдол бүртгэгдсэн. Насны хувьд 10-14 насныхан хамгийн их бүртгэгдсэн байна. Гэхдээ бүх насны хүн өвчлөх эрсдэлтэй бөгөөд урьдчилан сэргийлэх хамгийн сайн арга бол вакцин юм.

Дэлхийн168 улсад зургаадугаар сарын байдлаар улаанбурхан  өвчний бараг 89 мянган тохиолдол батлагдаад байна. 

Уг өвчнөөс урьдчилан сэргийлэх вакциныг есөн сар болон хоёр настайд товлолын дагуу хийдэг. Гэхдээ өвчний нөхцөл байдлаас шалтгаалж 6-8 сартайд нь хийх шийдвэрийг Эрүүл мэндийн яамнаас гаргасан. Халдварт өвчин судлалын үндэсний төв улаанбурхан өвчний өндөржүүлсэн бэлэн байдалтай холбоотойгоор зургаадугаар сарын 28, долоодугаар сарын 5-ны өдрийн бямба гарагт ажиллана.

Эцэг эх, асран хамгаалагчид та бүхэн хүүхдийнхээ дархлаажуулалтын  мэдээллийг нягталж, вакцинд дутуу хамрагдсан байвал яаралтай өрх, сумынхаа эрүүл мэндийн төвд хандаж нөхөн дархлаажуулалтад хамрагдах боломжтой.