Засгийн газраас 2025 оны төсвийн тухай хуульд нэмэлт, өөрчлөлт оруулах тухай хуулийн төслийг УИХ-д өргөн мэдүүлээд байна. Уг хуулийн төсөлтэй хамт Алт-3 аяныг хэрэгжүүлэх тухай УИХ-ын тогтоолын төслийг өргөн барив. Монгол Улсын экспортын гол орлогыг төвлөрүүлдэг нүүрсний  үнэ дэлхийн зах зээл дээр уналттай байгаагаас болж төсвийн орлого их хэмжээгээр тасалдсан. Энэ он цаашлаад 2026 онд нүүрсний үнэ сэргэхгүй гэж шинжээчид таамаглаж байна. Тэгвэл Монгол Улс нүүрсний орлогоо нөхөх, Монгол Улс руу орж ирэх валютын орлогоо юугаар нөхөж, юу зарах вэ гэдэг асуулттай нүүр тулж ирлээ. "Эхлээд алтны олборлолтоо нэмье" гэдэг гэдэг Засгийн газар, салбарын яам тогтжээ.

Алт-3 аяныг хэрэгжүүлэх УИХ-ын тогтоол батлагдсанаар Монгол Улсад батлагдсан 3 тонноос дээш нөөцтэй алтны ордуудыг эдийн засгийн эргэлтэд оруулах ажил эхлэх юм. Өөрөөр хэлбэл, алтны үндсэн ордыг ашиглах замаар алт тушаалтыг нэмэгдүүлэх зорилт тавьжээ.

Монгол Улсын алтны нөөцийн тухай

Монгол Улсын ашигт малтмалын нөөцийн нэгдсэн бүртгэлд бүртгэгдсэн 105 ордын 572.2 тонн нөөцөөс 347.1 тонн алтны нөөц бүхий 82 алтны үндсэн ордын хүчинтэй тусгай зөвшөөрөл бүртгэлтэй байгаа аж.

 Эдгээрээс 14 нь өнөөдрийн байдлаар тодорхой хэмжээнд ашиглагдаж байгаа бөгөөд 228.7 тонн нөөц бүхий 68 орд ямар нэг хуулийн хориглолт байхгүй хэр нь эдийн засгийн эргэлтэд ороогүй байна гэсэн судалгааны дүн гарсан байна. Тиймээс эргэлтэд ороогүй үндсэн ордуудыг идэвхжүүлэх хүрээнд алтны олборлолтоо нэмэх замаар валютын нөөцөө бүрдүүлнэ.