Өнөөдрийн Засгийн газрын хуралдаанаар улаанбурхан өвчний тархалтын нөхцөл байдлын талаар яригджээ. Засгийн газрын анхны болон ээлжит бус хуралдаануудаар мөн энэ сэдвийг онцгойлон хэлэлцсэн юм. Тухайлбал, улаанбурхан өвчнөөр халдварласан хүний тоо өнгөрсөн долоо хоногт 8160 орчим байсан бол ганцхан долоо хоногийн дотор 1500-аар нэмэгдсэн байна. Иймд өвчлөлийн тархалт, голомтыг хумих, дархлаажуулалтын ажлыг эрчимжүүлэх шаардлага тулгарч, Засгийн газрын нөөц хөрөнгөөс 5 тэрбум төгрөгийг зарцуулах шийдвэрийг гаргажээ. Энэ талаар Эрүүл мэндийн сайд Ж.Чинбүрэн мэдээлэл өглөө.

Тэрээр "Бага насны хүүхдүүдэд хоёр үе шаттай нөхөн дархлаажуулалт хийж эхэлсэн. Мөн голомтод өртсөн бүх хүнд, нас харгалзахгүй вакцин хийж байгаа. Удахгүй болох Үндэсний их баяр наадмын үеэр иргэд ямар нэгэн айдасгүйгээр оролцохын тулд эцэг эхчүүд хүүхдүүдээ вакцинд хамруулсан эсэхээ нягталж, вакцин хийлгээгүй бол заавал нөхөн вакцин хийлгэх шаардлагатай юм. Мөн 10-15 насны хүүхдүүд өмнө нь вакцин хийлгэсэн байсан ч дархлаа суларсан байж болзошгүй тул дахин хийлгэхэд эрсдэлгүй.

Наадам 7–10 хоног үргэлжилдэг. Энэ хугацаанд олон хүн цугларснаар халдвар дамжих эрсдэл өндөр бөгөөд өвчний нууц үе нь 10–15 хоног байдаг тул долдугаар сарын 20-ноос хойш өвчлөл нэмэгдэх магадлалтай байна. Үүнтэй холбогдуулан Улсын онцгой комиссын хуралдаан зохион байгуулж, цаашдын арга хэмжээг төлөвлөсөн. Эрүүл мэндийн яам бүх харьяа байгууллагууддаа долдугаар сарын 10-ныг хүртэл эрчимжүүлсэн бэлэн байдал зарласан. Энэхүү арга хэмжээ нь вакцинжуулалтын цар хүрээг нэмэгдүүлэхэд чиглэж байгаа юм.

Цагдаагийн ерөнхий газар, Тагнуулын ерөнхий газартай хамтран вакцины эсрэг худал мэдээлэл тарааж буй асуудалд хяналт тавьж, хууль хяналтын арга хэмжээ авч эхэлсэн. Бид одоогоор долоон сайхан хүүхдийг улаанбурхан өвчнөөр алдсан. Вакциныг эсэргүүцэн мэдэмхийрч буруу мэдээлэл тараадаг хүмүүс эдгээр хүүхдийн амь насны хариуцлагыг хүлээхгүй юм бол ард иргэдийг төөрөгдүүлэхээс татгалзах хэрэгтэй. Одоогоор хэрэглэж байгаа улаанбурханы вакцин нь шинэ технологиор хийгдээгүй, 1973 оноос хойш хэрэглэгдэж байгаа хүний биед ямар нэгэн аюулгүй дархлаажуулалт юм. Хүүхдэдээ вакцин хийлгэх эсэх нь эцэг эхийн хариуцлага билээ. Засгийн газрын зүгээс есдүгээр сард хичээлийн шинэ жил эхэлж, томуугийн улирал болохтой зэрэгцэн олон хүүхэд эмнэлэгт хэвтэх эрсдэлийг бууруулахын тулд вакцинжуулалтыг өндөр түвшинд хэрэгжүүлэхээр зорьж байна" гэв.