АНУ Ираны цөмийн байгууламжууд руу цохилт өгсний дараа Оросын цэргийн шинжээч дэлхийн III дайн дэгдэх эрсдэл бий болсныг анхаарууллаа. Улс төр судлаач, цэргийн шинжээч Евгений Михайловын хэлснээр АНУ-ын зүгээс Ираны Фордоу, Натанз, Исфахан дахь цөмийн байгууламжуудад өгсөн цохилт нь Ираныг бууж өгөхийг шаардсан аюултай дохио гэж үзжээ.

Тэрээр “АНУ дайнд албан ёсоор оролцож байгаагаа зарлаагүй ч аль хэдийнэ Иранд цохилт өгч эхэлсэн. Цөмийн байгууламжуудыг онилж байгаа нь Ираныг эсэргүүцлээ зогсоож, Америкийн шаардлагыг хүлээн зөвшөөрөхгүй бол нөхцөл байдал улам дордоно гэсэн дохио юм. Өөрөөр хэлбэл, бүрэн бууж өгөхийг шаардаж байна. Гэвч Иран үүнийг хүлээн зөвшөөрөхгүй” хэмээн “Вечерняя Москва” сонинд ярьжээ.

Михайловын үзэж байгаагаар, Ираны зүгээс НҮБ-ын Аюулгүйн Зөвлөлд хандсан нь цэвэр дипломат алхам бөгөөд бодит байдлыг өөрчлөхгүй аж. “НҮБ өөрийн үүрэгт ажлаа гүйцэтгэхээ больсон. Энэ байгууллага өнөөдөр дэлхийн зөрчлийг зогсоож чадах ‘холбогч’ үүргээ алдсан” гэж нэмж хэлжээ.

Шинжээчийн анхааруулснаар, АНУ-ын оролцоо нэмэгдсэнээр Иран-Израилын зөрчилд бусад улс орнууд татагдан орох магадлал өндөр байна. “Йемений Хути босогчид аль хэдийн Тегераныг дэмжихээ зарлаж, барууны орнуудын усан онгоцуудыг устгах болно гэж мэдэгдсэн. Ингэснээр энэ мөргөлдөөн улам өргөжнө” гэж Михайлов онцолжээ.

Пакистан ч мөн адил Ираны цөмийн байгууламжийг онилсон тохиолдолд Израилын эсрэг байр суурьтай болохоо илэрхийлсэн гэжээ. Михайловын үзэж байгаагаар, Тегераны цөмийн байгууламжуудад хүчтэй цохилт өгөх нь бүс нутгийн тогтворгүй байдлыг үүсгэж, улмаар III дайн дэгдэх эрсдэлийг бий болгоно. Үүнтэй зэрэгцэн хэдэн сая дүрвэгч Орос болон Азербайжанд шууд аюул учруулж болзошгүй байгаа аж. 

Мөн тэрээр дэлхий дахины дэг журамд өөрчлөлт авчрахуйц ноцтой цэргийн үйлдлүүд хэдийн эхэлсэн нь дэлхийн III дайны эхлэл ч байж мэднэ гэдгийг цохон тэмдэглэсэн байна.