Өнгөрсөн жилийн Үндэсний их баяр наадмын хүчит бөхийн барилдаанаар хамгийн анхаарал татаж, маргаан дагуулсан сэдэв бол шинэ хиймэл зүлэг. Долоодугаар сарын 11-ний өдөр бороо үргэлжлэн орж, бөхчүүд зүлгэн дээр халтирч байв. Халтирснаас болж өвдөг шороодохоос гадна бэртэл, гэмтэл авсан нь ч бий. Тэгвэл энэ жилийн наадмын зүлгийг хэрхэн зохицуулах талаар хотын дарга Х.Нямбаатар сэтгүүлчдийн асуултад хариуллаа.

Хотын дарга Х.Нямбаатар: Өнгөрсөн жилийн төв цэнгэлдэх хүрээлэнгийн зүлгийг Сүхбаатарын талбайд байршуулсан байгаа. Тухайн зүлгийг авчихъя гэхээр иргэд эндээ хэсэгтээ байх нь зүйтэй гээд байна. Монголд хиймэл зүлэг оруулж ирдэг хоёр компани л байдаг юм билээ. Иймд Баяр наадмын тухай хуульд заасны дагуу худалдан авах ажиллагааг зохион байгуулсан. Энэ сарын 24, 25-ны улсын болон аймаг, цэргийн цолтой бөхчүүдийг барилдуулж туршилтын ажлууд хийгдэнэ. Бид байгалийн зүлэг болгоё гэж нэлээн олон удаа ярилцсан. Гэхдээ наадмын бэлтгэл гээд морьтой хэд давхиад л ногоон зүлэг шороогоороо эргэчихдэг. Мөн Төв цэнгэлдэх орлого олохын тулд тоглолтууд зохион байгуулдаг. Иймд амьд зүлэг яагаад ч боломжгүй гээд ажлын хэсэг дээр дэмжигдээгүй. Тиймээс хамгийн сүүлийн үеийн үнэртдэггүй, халтирдаггүй байдлаар янзалж өөрчлөх ажил ид дундаа явж байгаа.