АНУ-ын холбооны шүүх лхагва гарагт Ерөнхийлөгч Дональд Трампын "Чөлөөлөх өдөр" нэртэй өргөн цар хүрээтэй тарифын шийдвэрийг хэрэгжүүлэхийг хориглолоо.
Шүүхийн шийдвэрт Трамп импортын хэмжээгээ АНУ-аас илүүтэй экспортолдог орнуудад нийтлэг тариф ногдуулахдаа эрх мэдлээ хэтрүүлсэн гэж дүгнэжээ.
Нью-Йорк хотод байрладаг Олон улсын худалдааны шүүхийн шийдвэрт дурдсанаар, АНУ-ын Үндсэн хуульд гадаад орнуудтай хийх худалдааг зохицуулах бүрэн эрх нь Конгресст хадгалагдаж байгаа бөгөөд энэ эрхийг Ерөнхийлөгч эдийн засгийн аюулгүй байдлыг хангах онцгой эрх мэдлээр халж үл болно гэжээ.
Энэхүү шүүхийн нэхэмжлэлийг нам бус "Liberty Justice Center" байгууллага Трампын тарифын арга хэмжээний бай болж буй орнуудаас бараа импортолдог таван жижиг Америк компанийн өмнөөс гаргасан байна. Энэ нь Трампын тарифын бодлогын эсрэг хуулийн анхны томоохон сорил болж байна.
Эдгээр таван компани Нью-Йоркийн дарс, согтууруулах ундаа импортлогч, Виржиниа мужийн боловсролын багц болон хөгжмийн зэмсэг үйлдвэрлэгч зэрэг төрөл бүрийн салбарыг төлөөлж байгаа бөгөөд Трампын тариф тэдний бизнес эрхлэх боломжид сөргөөр нөлөөлж байна гэж мэдэгджээ.
Энэхүү хэрэг Трампын тарифын бодлогын эсрэг өрнөж буй долоон нэхэмжлэлийн нэг бөгөөд АНУ-ын 13 муж болон өөр олон жижиг бизнесүүд ижил төстэй гомдол гаргаад байгаа юм.
Цагаан ордон уг шийдвэрийг эсэргүүцэж, давж заалдахаар төлөвлөж байгаа бөгөөд Трампын захиргаа эдгээр татваруудыг үндэсний аюулгүй байдал, худалдааны алдагдлыг бууруулах зорилгоор хэрэгжүүлсэн гэж мэдэгдсэн байна.
