Талийгаач жүжигчин Ким Сае-роны тоглосон сүүлчийн кино болох "Gitar Man" энэ сарын 30-нд нээлтээ хийх ажээ.

"Gitar Man" бол амьдралын хүнд хэцүү үед ч хөгжим, харилцаа холбоогоор дамжуулан итгэл найдварыг эрэлхийлдэг авьяаслаг гитарчны тухай кино юм. Ким Сае-рон "Volcano" нэртэй амьд хөгжмийн хамтлагийн гитарчин Ёо Жингийн дүрийг бүтээсэн аж.

Ким Сае-Рон 2025 оны хоёрдугаар сард 24 настайдаа таалал төгссөн. 2000 онд төрсөн Ким Сае-Рон 2001 онд загвар өмсөгчөөр урлагийн гараагаа эхэлж, “Brand New Life”, “The Man From Nowhere”, “The Neighbours and A Girl at My Door” кинонуудаар дамжуулан алдар нэр нь өссөн. 2022 онд Сөүлийн Чондам-донг хотод согтуугаар машин жолоодож байхдаа осол гаргасан нь нийгмийн шүүмжлэл дагуулсан билээ.

Түүнийг нас барсны дараа ар гэрийнхэн нь түүнийг жүжигчин Ким Сүн Хёнтой 16 настайгаасаа үерхэж байсан хэмээн мэдэгдэж, согтуугаар жолоо барьсны дараа түүнээс 700 сая вон (520,000 ам. доллар) нэхэмжилсэн гэж буруутгаад байсан юм.

Ким Сүн Хён болон түүний агентлагийнхан хэвлэлийн бага хурал зарлаж, энэ мэдээллийг үгүйсгэж, Ким Сае-Роныг насанд хүрсэн хойно нь харилцаж байсан хэмээсэн.

Эх сурвалж: Scmp.com