АНУ-ын Ерөнхийлөгч Дональд Трампын засаг захиргаа пүрэв гарагт Харвардын их сургуулийн гадаад оюутан элсүүлэх эрхийг хүчингүй болгож, одоогийн гадаад оюутнуудыг бусад сургууль руу шилжихгүй бол хууль ёсны статусаа алдана хэмээн анхааруулжээ. Мөн энэ арга хэмжээг бусад их дээд сургуулиудад ч өргөтгөж болзошгүй байгаа аж.

АНУ-ын Дотоодын аюулгүй байдлын яамны мэдэгдэлд дурдсанаар Харвардын их сургуулийн Оюутан солилцооны хөтөлбөрт олгосон гэрчилгээг 2025-2026 оны хичээлийн жилээс эхлэн хүчингүй болгох тушаал гаргасан байна.

Учир нь энэ оны дөрөвдүгээр сард АНУ-ын Дотоодын аюулгүй байдлын сайд Кристи Ноэм сургуулийн орчинд байгаа гадаад оюутнуудын гэмт хэрэг, зөрчлийн талаарх мэдээллийг өгөхөөс татгалзвал гэрчилгээг цуцлана хэмээн Харвардын захиргаанд анхааруулж байсан юм. Албан ёсны мэдэгдэлд дурдсанаар “Харвард шаардсан мэдээллийг ил тод гаргаж өгөхөөс татгалзсан бөгөөд Дотоодын аюулгүй байдлын яамны Ерөнхий зөвлөлийн газраас дахин илгээсэн хүсэлтийг ч мөн үл ойшоосон” гэжээ.

Түүнчлэн Кристи Ноэм тус сургуулийг “хүчирхийлэл, еврейчүүдийн эсрэг үзлийг дэмжиж, БНХАУ-ын Коммунист намтай хамтран ажиллаж байна” хэмээн буруутгасан билээ.

Харвардын зүгээс Трампын засаг захиргааны энэхүү шийдвэр нь олон мянган оюутанд нөлөөлж байгаа хууль бус үйлдэл төдийгүй өш хонзонгийн шинжтэй гэж мэдэгдсэн байна.

2024-2025 оны хичээлийн жилд Харвард нийт 6800 орчим гадаад оюутан элсүүлсэн нь сургуулийн нийт элсэлтийн 27 хувийг эзэлж байжээ. Харин 2022 онд Хятадын 1016 оюутан элсэж гадаад оюутнуудын ихэнхийг бүрдүүлж байв. Үүний дараагаар Канад, Энэтхэг, Өмнөд Солонгос, Их Британи, Герман, Австрали, Сингапур, Японы оюутнууд орж байжээ.