2017 онд АНУ-ын Калифорни мужид анхны нийтийн хэрэглээний цахилгаан скүүтерийн үйлчилгээ нэвтэрсэн цагаас хойш цахилгаан скүүтерийн хэрэглээ дэлхийн улс орнуудад түгээмэл болсон юм. 2022 онд цахилгаан скүүтер хэрэглэгчдийн тоо 350 саяд хүрч, дэлхийн улс орнуудад цахилгаан дугуй /суррон/, цахилгаан скүүтерийг бага насны хүүхэд унах, явган зорчигч мөргөлдөж гэмтээх, автомашинтай мөргөлдөх, зориулалтын зогсоол байхгүйгээс явган зам болон бусад талбайд түгжрэл үүсгэх, орц, гарц хаах зэрэг олон асуудлыг үүсгэж эхэлжээ. Эдгээр асуудлууд нь яг одоо Монгол Улсад тулгамдаж буй асуудлуудын нэг болоод байна. Дэлхийн бусад улс орнууд энэ тал дээр ямар арга хэмжээ авсан туршлага дээр үндэслэн манай улс ч мөн Замын хөдөлгөөний аюулгүй байдлын тухай хуульдаа нэмэлт өөрчлөлт оруулах шаардлагатай болсон юм.

Сүүлийн таван жилийн хугацаанд буюу 2019-2024 оны эхний долоон сарын байдлаар цахилгаан дугуй /суррон/, цахилгаан скүүтер-с үүдэлтэй нийт 584 осол гэмтлийн шинэ тохиолдол бүртгэгджээ. Насны хувьд 10-19 насны иргэд энэ төрлийн осол гэмтэлд илүү өртсөн байгаа юм. Мөн нийт тохиолдлын 94 хувь нь нийслэлд бүртгэгдсэн бөгөөд цагдаагийн байгууллагад бүртгэгдсэн зөрчлийн тоон мэдээллээс үзэхэд унадаг дугуй, цахилгаан скүүтер, цахилгаан дугуй /суррон/-наас үүдэлтэй нийт 206 зам тээврийн осол бүртгэгдсэн байна. Манай улсад нэвтэрсэн шинэ төрлийн цахилгаан тээврийн хэрэгслүүдийн ангилал, тодорхойлолт, энэ төрлийн тээврийн хэрэгслээр замын хөдөлгөөнд оролцох жолоочийн эрх, үүрэг одоогийн мөрдөж буй Замын хөдөлгөөний аюулгүй байдлын тухай хууль болон Замын хөдөлгөөний дүрмээр тодорхой зохицуулалтгүй байгаа юм. Мөн энэ төрлийн тээврийн хэрэгслийг Монгол улсын нутаг дэвсгэрт импортоор оруулж нийтэд төлбөртэй ашиглуулах үйлчилгээ үзүүлэгчдэд хяналт тавих эрх зүйн орчин байхгүй аж.

Иймд дээрх шинэ төрлийн цахилгаан тээврийн хэрэгслүүдийн ангилал, тодорхойлолтыг шинээр хуульчлах, тухайн ангиллын тээврийн хэрэгслийг жолоодох насны хязгаар, тээврийн хэрэгсэлд тавих техникийн ерөнхий шаардлага, тээврийн хэрэгслийг жолоодож замын хөдөлгөөнд оролцож байгаа этгээдийн эрх, үүрэг, хариуцлага, мөн дээрх тээврийн хэрэгслээр нийтэд төлбөртэй үйлчилгээ үзүүлж байгаа хуулийн этгээдийн эрх зүйн байдлыг шинээр хуульчлах асуудлуудыг зохицуулах зорилгоор УИХ-ын гишүүн П.Батчимэгээр ахлуулан нийт таван гишүүний бүрэлдэхүүнтэй ажлын хэсэг Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төслийг боловсруулсан байна.

Манай улсын Замын хөдөлгөөний аюулгүй байдлын тухай хуульд нэмэлт, өөрчлөлт оруулах тухай хуулийн төсөл батлагдсанаар цахилгаан дугуй, цахилгаан скүүтерээр замын хөдөлгөөнд оролцогч, нийтийн хэрэглээний цахилгаан дугуй, цахилгаан скүүтерийн үйлчилгээ үзүүлэгч хуулийн этгээдийн эрх, үүрэг тодорхой болж хариуцлага нэмэгдэх юм.