БНХАУ-ын дарга Ши Жиньпин пүрэв гарагт ОХУ-ын Ерөнхийлөгч Владимир Путинтай Кремльд уулзах үеэр Хятад, Орос хоёр улс “ган мэт нөхөрлөлтэй байх” ёстой хэмээн мэдэгдэж, хоёр талын хамтын ажиллагааг шинэ түвшинд гаргаж, АНУ-ын нөлөөг шийдэмгий эсэргүүцэхээ амлалаа.
Кремльд болсон хэлэлцээний үеэр хоёр удирдагч өөрсдийгөө АНУ-ын давамгайлалд суурилсан хуучин дэлхийн дэг журмыг халж буй шинэ дэг журмын хамгаалагчид хэмээн тодорхойлов.
Хамтарсан урт мэдэгдэлдээ тэд бүх салбарт, тэр дундаа цэргийн харилцаагаа гүнзгийрүүлж, “АНУ-ын Орос, Хятад хоёрыг зэрэг хязгаарлах бодлогыг шийдэмгий эсэргүүцэхийн тулд уялдаа холбоогоо бэхжүүлэх” тухай дурджээ.
Кремлийн тансаг танхимд Ши Жиньпинтэй мэндчилсний дараа Путин Ялалтын баярын 80 жилийн ойд хүрэлцэн ирсэнд нь талархал илэрхийлэв. Тийнхүү Путин “Фашизмыг ялсан энэ ялалт асар их золиосын үр дүн учир үүрд дурсагдах ёстой. Бид хятад анд нөхөдтэйгөө хамт түүхэн үнэнийг хамгаалж, дайны үеийн үйл явдлуудыг мартахгүй хадгалан үлдэж, нео-нацизм болон милитаризмын орчин үеийн илрэлүүдтэй тэмцэж байна” гэжээ.
Ши Жиньпин “Өнөөдөр дангаар ноёрхох үзэл дахин сэргэж, олон улсын тавцанд хүч түрэх, дээрэлхэх үйлдлүүд гарч буй энэ үед Хятад улс НҮБ-ын Аюулгүйн Зөвлөлийн байнгын гишүүн, их гүрний хувиар Оростой хамт тусгай үүргээ хүлээж биелүүлэх болно” гэж хэлжээ.
Тэрээр Украины мөргөлдөөнийг хэлэлцээгээр шийдэхийг уриалж, АНУ-ыг Украиныг зэвсгээр ханган дайныг улам дэвэргэж байна гэж буруутгав. Түүнчлэн АНУ-ыг чиглэсэн хандлагатай өөр нэг мэдэгдэлдээ Хятад, Орос хоёр улс “Нэг талыг барьсан бодлого болон дээрэлхүү үйлдлүүдтэй хамтран тэмцэнэ” гэж онцолжээ.
Харин Путин хоёр орны харилцааны бүх чухал асуудлыг Ши Жиньпин даргатай хамт биечлэн хянаж, 2030 он гэхэд худалдаа, хөрөнгө оруулалтыг үлэмж хэмжээгээр нэмэгдүүлэх зорилготой байгаагаа мэдэгдсэн байна.
Путин, Ши Жиньпин нарын албан ёсны уулзалтаараа хэлэлцсэн асуудлыг дараах байдлаар тоймлолоо.
Стратегийн түншлэлийг бэхжүүлэх
Путин, Ши Жиньпин нар хоёр орны иж бүрэн стратегийн түншлэлийг улам гүнзгийрүүлэх хамтарсан мэдэгдэлд гарын үсэг зурсан. Путин харилцаагаа "өөрийн дотоод хүчээр тогтносон" хэмээн тодорхойлж, хоёр орны хоорондын төлбөр тооцоонд үндэсний мөнгөн тэмдэгтийг түлхүү ашиглах талаар онцолжээ.
Эдийн засаг, эрчим хүчний хамтын ажиллагаа
Хоёр улсын зүгээс эрчим хүч, хөдөө аж ахуй, нисэх онгоц, хиймэл оюун ухаан, сансар судлал зэрэг салбарт хамтран ажиллах төлөвлөгөөгөө танилцуулжээ. Мөн ОХУ-аас БНХАУ руу Монголоор дамжуулан шинэ хийн хоолой барих асуудлыг хэлэлцсэн байна.
Хоёр улс цаашид хамтарсан цэргийн сургуулилалт хийх, байнгын хамтарсан тэнгис, агаараар эргүүл хийх асуудлаар тохиролцоонд хүрчээ.
Геополитикийн байр суурийн уялдаа
Тэд АНУ-ын тэргүүлсэн дэлхийн дэг журам болон "давхар хяналтын" стратегийг эсэргүүцэж буйгаа илэрхийлэв. Путин "Нэг Хятад" бодлогыг дэмжиж буйгаа илэрхийлж, Тайвань нь Хятадын салшгүй нэг хэсэг гэж үзэж байгаагаа мэдэгдсэн юм.
Энэ долоо хоногт Москвад айлчилж буй 20 гаруй гадаадын удирдагчдын дундаас Ши Жиньпин хамгийн нөлөө бүхий нь бөгөөд өнөөдөр болох Ялалтын баярын парадад оролцох билээ. Ши Жиньпиний оролцоо болон Оросын байр суурийг дэмжсэн хамтарсан мэдэгдэл нь Путины хувьд том дэмжлэг болж байна. Хятад улс бол Оросын хамгийн том худалдааны түнш бөгөөд Москваг өрнөдийн хоригийн үед эдийн засгийн хувьд тэтгэж буй гол улсуудын нэг юм.
