АНУ-ын Ерөнхийлөгч Дональд Трамп Их Британитай худалдааны хэлэлцээр байгуулсныг зарлалаа. Энэ нь Трамп худалдааны түншүүддээ өргөн хүрээтэй тариф ногдуулснаас хойш АНУ-ын анх удаа байгуулж буй хоёр талын худалдааны хэлэлцээр юм.

Хэлэлцээрийн хүрээнд Их Британи АНУ-ын бараа бүтээгдэхүүнд тавьж буй тарифын бус хязгаарлалтыг бууруулах бөгөөд үүнд үхрийн мах, этилийн спиртийн түлш, машин механизм, химийн бодис зэрэг бараа орж байна гэж Трамп мэдээлжээ. Хэдийгээр АНУ-ын олон улсад тавьсан 10 хувийн үндсэн тариф хэвээр хадгалагдах ч Их Британийн автомашинд ногдох тариф 25 хувиас 10 хувь хүртэл буурна гэж Худалдааны нарийн бичгийн дарга Ховард Латник мэдэгдэв.

Ерөнхийлөгч Трамп энэхүү хэлэлцээрийг "түүхэн ач холбогдолтой" гэж тодорхойлон, АНУ-ын экспортод тавигддаг тарифын бус саадыг бууруулахад чухал алхам болсон хэмээв. Тэрээр хэлэлцээр ойрын долоо хоногт бичгээр бүрдэж дуусах бөгөөд АНУ-ын үхрийн мах, этилийн спиртийн түлш зэрэг бүтээгдэхүүн Их Британийн зах зээлд илүү өргөнөөр нэвтрэх боломж нээгдэнэ гэж нэмж дурджээ.

Мөн Их Британи АНУ-аас импортлох машин механизм, химийн бүтээгдэхүүнийг гаалийн бичиг баримтын бүрдүүлэлтээр шуурхай оруулах тал дээр тохиролцсон байна.

Хэлэлцээрийн гол заалтуудыг Худалдааны нарийн бичгийн дарга Ховард Латник Цагаан ордны Зууван танхимд болсон хэвлэлийн хурлын үеэр танилцуулжээ. Тэрээр “Энэ хэлэлцээрээр бид шинэ зах зээлийн боломжуудыг нээж чадлаа. Этилийн спирт, үхрийн мах, машин механизм болон бусад хөдөө аж ахуйн бүтээгдэхүүнүүдийн хувьд Их Британи зах зээлээ нээхээр зөвшөөрсөн нь АНУ-ын экспортлогчдод 5 тэрбум ам.долларын нэмэлт боломж бий болгоно” хэмээн онцлов.

Латник мөн хэлэхдээ, Их Британи 10 хувийн үндсэн тарифын системд хамаарсан хэвээр байх боловч автомашины салбартаа хөнгөлөлт эдэлж, 25 хувийн тарифыг 10 хувь болгон бууруулж чадсан гэв. “Одоо тэд 100,000 автомашин АНУ-д экспортлохдоо зөвхөн 10 хувийн тариф төлнө. Энэ нь Их Британийн автомашины салбарыг хамгаалж байна” гэж тэр нэмж хэлжээ.