МАК компани аж үйлдвэрийн салбарын хөгжлийн тулгамдсан асуудал, гарц шийдлийг хэлэлцэх MAKBM арга хэмжээг хоёр дахь жилдээ зохион байгууллаа. Энэ жил сэргээгдэх эрчим хүч, ногоон үйлдвэрлэлийн хөгжлийг түргэсгэхэд тулгарч буй сорилт, боломжуудыг онцлон хэлэлцсэн юм. Түүнчлэн барилгын материал үйлдвэрлэлийг цогцоор нь хөгжүүлэх “Аж үйлдвэрийн парк”, эрчим хүчний хэмнэлттэй амины орон сууцны “MAK Евро Хаус” төслөө олон нийтэд танилцууллаа.
Манай улсад аж үйлдвэрийн салбараа хурдацтай хөгжүүлэх зайлшгүй шаардлага бий. Учир нь, нэгдүгээрт Монгол Улсын эдийн засгийн нөхцөл байдал уул уурхайн салбараас шууд хамааралтай. Хоёрдугаарт, үйлдвэрлэлээ хөгжүүлж чадаагүй тул импортын хараат байдал ихтэй. Тиймээс аж үйлдвэрийн салбарыг хөгжүүлэх алсын хараатайгаар үйл ажиллагаа явуулж МАК компани Төв аймгийн Сэргэлэн суманд “Аж үйлдвэрийн парк” байгуулахаар ажиллаж байгаа юм байна. Тус компани нь одоогийн байдлаар эх орондоо дэлхийд тэргүүлэх Европ стандартын 7 үйлдвэр байгуулж, дотоодын зах зээлд 20 гаруй нэр төрлийн бүтээгдэхүүн нийлүүлж буй. Энэхүү аж үйлдвэрийн паркийн төслийн хүрээнд файбер цементэн хавтан, уут шуудай, цемент тээрэм, хуванцар бүтээгдэхүүний үйлдвэр байгуулахаар төлөвлөжээ.
Үүгээр ч зогсохгүй, аж үйлдвэрийн салбарын хөгжилд эрчим хүчний хомсдол ихээхэн нөлөөлдөг тул өөрийн харьяа үйлдвэр, уурхайн эрчим хүчний хэрэглээг сэргээгдэх эрчим хүчээр шийдэхээр БНХАУ-ын Huawei Technologies компанитай хамтын ажиллагаа эхлүүлжээ. Энэ хүрээнд Дорноговь аймгийн Даланжаргалан суманд байрлах МАК Цемент үйлдвэрийн нийт эрчим хүчний хэрэглээний 40 хүртэлх хувийг хангах 48МВт.цаг/19.2МВт-ын батарей хуримтлуур бүхий 19.7МВт хүчин чадалтай нарны цахилгаан станцыг байгуулаад байгаа аж.
Мөн МАК компани эх орондоо Европ стандартын дагуу үйлдвэрлэж буй барилгын материалуудаар барьсан дулаан алдагдалгүй, эрчим хүчний хэмнэлттэй “МАК Евро Хаус” амины орон сууцны төслөө танилцууллаа. Тус компанийн үйлдвэрлэж буй блок, асгамал дулаалга, цонх, хаалга зэрэг бүтээгдэхүүн нь барилгын дулаан алдагдлыг бууруулах дэвшилтэт технологиор хийгдсэн тул манай орны эрс тэс уур амьсгалд нэн тохиромжтой юм.
Барилгын нийт зардлын 70-80 хувийг барилгын материал эзэлдэг. Иймд МАК компани өөрийн үйлдвэрлэдэг 10 төрлийн барилгын материал болон хамтрагч байгууллагуудын бүтээгдэхүүнүүдийг хөнгөлөлттэй үнээр нийлүүлэх юм байна. Нийт дөрвөн төрлийн орон сууцны төсөл танилцуулсан бөгөөд эдгээр эрчим хүчний хэмнэлттэй амины орон сууцаас захиалах иргэдэд Хаан, Хас, Голомт, Худалдаа хөгжлийн банкны хөнгөлөлттэй, ногоон зээлд хамрагдах боломж олгож байгаагаа зарлалаа.
