Засгийн газрын ээлжит хуралдаан болж, хуралдаанаас гаргасан зарим шийдвэрийн талаар холбогдох сайд нар мэдээлэл хийлээ. Өнөөдрийн хэвлэлийн хуралд ЗГХЭГ-ын дарга Н.Учрал, Хууль зүй, дотоод хэргийн сайд О.Алтангэрэл, Байгаль орчны сайд С.Одонтуяа Гэр бүл, хөдөлмөр нийгмийн хамгааллын сайд Л.Энх-Амгалан, Боловсролын сайд П.Наранбаяр, Эрүүл мэндийн сайд Т.Мөнхсайхан нар оролцлоо.

О.Алтангэрэл: Гэр бүлийн тухай хуулийн төслийг УИХ-д өргөн барина

Хууль зүй, дотоод хэргийн сайд О.Алтангэрэл: Засгийн газрын өнөөдрийн хуралдаанд хүүхдийн асуудалд онцгойлон анхаарал хандуулан хэлэлцлээ. Гэр бүлийн хуулийг батлуулах, хүүхэд хамгааллын үйл ажиллагааг идэвхжүүлэх, хүүхэдтэй холбоотой хэрэг хянан шийдвэрлэх ажиллагааны процессыг хялбаршуулах, хүүхдийн эрхийг хамгаалах, шаардлагатай хууль дүрэм журмуудын талаар судалгаа хийхийг Хууль зүй дотоод хэргийн сайдад даалгалаа.

Мөн өнөөдрийн хуралдаанаар олон улсын болон дипломат төлөөлөгчийн газруудын аюулгүй байдалтай холбоотой асуудлыг хэлэлцлээ. Монгол Улсын нутаг дэвсгэрт үйл ажиллагаа явуулж байгаа дипломат төлөөлөгчид, Олон улсын байгууллагуудтай холбоотой харуул хамгаалалтад онцгойлон анхаарч ажиллах зохих арга хэмжээ авахыг Хууль зүй дотоод хэргийн сайдад даалгалаа.

Т.Мөнхсайхан: Хүүхдийн эрт илрүүлгийн тогтолцоог бэхжүүлнэ

Эрүүл мэндийн сайд Т.Мөнхсайхан: Хүүхэд хамгааллын байгууллага үүсэж хөгжсөний 100 жилийн ой тохиож байна. Үүнтэй холбоотойгоор өчигдөр Хүүхдийн төлөө үндэсний зөвлөл шинэчилсэн бүрэлдэхүүнээрээ анхны хурлаа хийсэн. Хурлаар хэлэлцсэн асуудлын талаар Засгийн газарт мэдээлэл өглөө.

Хүүхдийг эхийн хэвлийд байхаас нь эхэлж анхаарал хандуулж ажиллана. Сургууль, цэцэрлэгийн эрт илрүүлэг урьдчилсан үзлэгийн тогтолцоог бэхжүүлнэ. Зургаан настнуудын эрт илрүүлгийг орон даяар эрчимжүүлж, 4, 10,12 дугаар ангиудад хийгдэх эрт илрүүлгийг сайжруулна. ЕБС-ийн хүүхдүүдийг эрүүл төгсдөг, өвчин эмгэг байвал эрт илрүүлж оношилж, эмчилдэг байх бодлого барина.

С.Одонтуяа: Айл бүр хашаандаа 5 мод тарих төсөл хэрэгжүүлж, 8000 өрхийг хамруулна

Байгаль орчны сайд С.Одонтуяа: Өнөөдрийн хуралдаанаар цацраг идэвхт бодисын нөлөөлөл, хөрс, ус, агаарын бохирдлын нөлөөллийг хэмжих олон улсын лаборатори байгуулах шийдвэр гарлаа. Хархорин хотод ногоон төгөл, ногоон бүс байгуулах ажил бол энэ жилийн томоохон төсөл. Айл бүр хашаандаа таван мод тарих ажлыг яамнаас хийнэ. Нийслэлийн бүх дүүрэг, 108 хороо 8000 өрхөд айл бүр хашаандаа 5 мод тарих ажлыг хийнэ. И Монголд айл бүр тарьсан модоо бүртгүүлэх системийг нэвтрүүлнэ.

П.Наранбаяр: Хүүхдэд нийгмийн орчин шаардлагатай байна

Боловсролын сайд П.Наранбаяр: Хүүхдийн байгууллагын 100 жилийн ойд зориулсан бодлогын чухал шийдвэрүүд гаргалаа. Хүүхдийг хамгаалах, ялангуяа дотуур байран дахь хүүхдийн аюулгүй байдлыг хамгаалах, нөхцөл байдлыг сайжруулах шийдвэрүүд гаргалаа. Мөн хүүхдийн зөвлөлөөс санал тавиад Сурагчдын өөрөө удирдах зөвлөлийн бие даасан байдлыг хангах, удирдах ажиллагаанд оролцох ажлыг ажил хэрэг болгоно.

Нийгмийн сүлжээнд 16 хүртэлх насны хүүхэд оролцох анхдагч хуулийн төслийн ажлын хэсэг байгуулагдаад ажиллаж байна. Хуулийн төслийг Засгийн газарт танилцуулаад УИХ-д өргөн барина.

Мөн хүүхдийн зуслангуудыг сэргээх асуудлыг хэлэлцлээ. Хүүхдийн ордон байгуулах асуудлыг мөн ярьж байна. Хүүхдэд нийгмийн орчин шаардлагатай байна.

Л.Энх-Амгалан: 5-8 жилийн дараа дөрвөн гэр бүлийн нэг нь салж байна

Гэр бүл, хөдөлмөр нийгмийн хамгааллын сайд Л.Энх-Амгалан: Хүүхдийн байгууллага үүсэж хөгжсөний 100 жилийн ойг бид маргааш тэмдэглэх гэж байгаа. Мөн энэ жил Монгол Улс НҮБ-ын Хүүхдийн эрхийн конвенцод нэгдэн орсны 35 жилийн ой тохиож байна.

Шинэ Засгийн газар байгуулагдаад Гэр бүл хөдөлмөр нийгмийн хамгааллын яам байгуулсан. Өөрөөр хэлбэл, гэр бүлийн бодлого нийгмийн хамгааллын өмнө байна. Тиймээс Монгол Улсын нийгмийн хамгааллын тогтолцоо гэр бүл рүү чиглэсэн байх ёстой. Хүний хөгжлийн бодлого гэр бүл рүү чиглэсэн байх ёстой гэж үзэж Гэр бүлийн яамыг шинэчлэн зохион байгуулсан.

Жилд 17 мянган гэр бүл Монгол Улсад бүртгэгдээд 5-8 жилийн дараа дөрвөн гэр бүлийн нэг нь салж байна. Өрх толгойлсон эцэг, эхийн тоо жилээс жилд өсөж 70-80 мянгад хүрч байна. Эрсдэлтэй нөхцөлд амьдарч байгаа хүүхдийн тоо 100 мянга болсон. Энэ мэт маш олон сэтгэл эмзэглүүлсэн асуудал байгаа учраас Хүүхдийн төлөө үндэсний зөвлөлийг шинэчлэн байгуулсан. Тус зөвлөлөөс аравдугаар сарын 1-н хүртэл хэрэгжүүлэх албан даалгавар гаргасан. Хүүхэд хамгаалах, хөгжил, хүүхдийн оролцооны асуудал салбар дундын асуудал байгаа. 

Өнгөрсөн хугацаанд Хүүхдийн төлөө фондод 25 тэрбум төгрөг цугларсан. Харамсалтай нь энэ мөнгийг захиран зарцуулах журам хоцрогдсон байсан учраас шинэчлэн баталсан. Энэ хөрөнгийг хэрхэн арвижуулах, олон нийтэд ил тод байх вэ гэдэг чиглэл өгсөн. Үүнийг хүүхдэд чиглэсэн үйл ажиллагаанд зарцуулахаар төлөвлөж байна. Тухайлбал, Хүүхдийн төлөөх санд төвлөрсөн мөнгөөр цаашид ямар хөрөнгө оруулалтаа хийх вэ гэдэгт иргэдээс санал авна. Урлагийн театр байгуулах, дугуйлан секцүүд ажиллуулах, IT парк байгуулахад зарцуулахаар төлөвлөөд байна.

2025 оныг боловсролыг дэмжих жил болгон зарласан. МУ-д 220 гаруй зуслан ажиллаж байсан. Харамсалтай нь өмч хувьчлалаар үйл ажиллагааны чиглэл нь өөрчлөгдсөн байна. Шинээр дөрвөн улирлын зуслан байгуулах талаар ярьж байна. Гэр бүлийн хуулийн 2025 онд шинэчилнэ. Уг хуульд маш олон зохицуулалт орсон. Үүнийг эрх зүйн үүднээс зохицуулахын тулд Гэр бүлийн тухай хуульд өөрчлөлт оруулна гэв.