ОХУ-ын ерөнхийлөгч Владимир Путин ням гарагт цацагдсан ярилцлагадаа Украинд цөмийн зэвсэг хэрэглэх шаардлага гараагүй, ийм шаардлага үүсэхгүй гэж найдаж байгаагаа мэдэгджээ.
Түүний эрх мэдэлд гарснаас хойших 25 жилийн түүхийг өгүүлэх Оросын төрийн телевизийн бэлтгэсэн уг баримтат кинон дээр Путин Орос улс Украины дайныг "логик төгсгөл"-д хүргэх хүч чадал, боломжтой хэмээн онцолсон байна. Тэрээр төрийн телевизийн сэтгүүлчийн Украины Орост хийж буй цохилтын талаар тавьсан асуултад хариулахдаа “Дайнд цөмийн зэвсэг хэрэглэх шаардлага үүсээгүй… Тийм шаардлага гарахгүй гэж найдаж байна” хэмээжээ.
ОХУ 2022 оны эхээр Украин руу халдсанаас хойш АНУ-ын албан тушаалтнуудын хувьд цөмийн хурцадмал байдал үүсэх эрсдэл бодлогын томоохон хүчин зүйл байсаар ирсэн. АНУ-ын Тагнуулын төв газрын дарга асан Уильям Бёрнс 2022 оны сүүлээр Орос улс Украинд цөмийн зэвсэг хэрэглэх бодит аюул байсан хэмээн мэдэгдсэн байдаг. 2022 оны намар АНУ Орос улсын тактикийн цөмийн зэвсэг ашиглаж болзошгүй нөхцөл байдлыг харгалзан үзэж, тийм алхам хийвэл ямар үр дагавартай болохыг Путинд анхааруулж байв. Тухайн үед Хятадын удирдагч Ши Жиньпин ч мөн адил цөмийн зэвсэг хэрэглэхээс татгалзахыг Путинд сануулж байсан юм.
2024 оны арваннэгдүгээр сард Путин Оросын цөмийн доктрины шинэчилсэн хувилбарт гарын үсэг зурсан. Уг баримт бичиг нь ОХУ дэлхийн хамгийн том цөмийн зэвсгийн нөөцтэй улс болохын хувьд ямар нөхцөлд цөмийн зэвсэг хэрэглэх боломжтойг тодорхойлсон бөгөөд шинэ хувилбар нь босгыг багасгаж, ердийн зэвсгээр хийсэн, гэхдээ цөмийн гүрний дэмжлэгтэй дайралтад хариу болгон цөмийн зэвсэг хэрэглэх боломжийг нээсэн.
2022 оны хоёрдугаар сард Путин хагас сая шахам Оросын цэргийг Украинд оруулан халдлага эхлүүлсэн. Өнөөдөр Москвагийн хүчнийхэн Украины нутаг дэвсгэрийн ойролцоогоор 20 хувийг, тэр дундаа өмнөд ба зүүн бүсийн хэсгүүдийг хяналтдаа авчээ.
КГБ-ийн дэд хурандаа асан Путин 1999 оны сүүлчийн өдөр Борис Елциныг залгамжлан төрийн эрхэнд гарсан бөгөөд 1999–2008 онд Ерөнхийлөгч, 2008–2012 онд Ерөнхий сайд, улмаар 2012 оноос хойш дахин Ерөнхийлөгчөөр ажиллаж байна.
Төрийн телевизийн бэлтгэсэн “Орос, Кремль, Путин — 25 жил” нэртэй баримтат кинонд “Та залгамж халааны талаар боддог уу?” гэсэн асуултад Путин “Би үргэлж энэ талаар боддог” гэж хариулсан байна. Түүнчлэн “Эцэст нь шийдвэрийг ард түмэн, Оросын ард түмэн л гаргана. Би ард түмэнд сонголт хийх боломж олгохын тулд нэг биш, хэд хэдэн хүн нэр дэвших ёстой гэж боддог” хэмээн нэмж хэлжээ.
Одоогоор Путинд тодорхой залгамжлагч хараахан тодроогүй байгаа бөгөөд ОХУ-ын Үндсэн хуулиар, хэрэв Ерөнхийлөгч үүргээ гүйцэтгэж чадахаа больсон тохиолдолд Ерөнхий сайд — одоогоор Михаил Мишустин — түүний бүрэн эрхийг шилжүүлэн авна гэж заасан байдаг.
