УИХ дахь АН-ын бүлэг Ерөнхий сайд Л.Оюун-Эрдэнийг УИХ-аас, УИХ-ын гишүүн Ж.Баярмаагаас уучлал гуйх ёстой. Ерөнхий сайдыг уучлал гуйтал УИХ дахь АН-ын бүлэг УИХ болон байнгын хорооны хуралд суухгүй гэдгээ мэдэгдээд байгаа. Тэгвэл өнөөдөр бүлгийн гишүүд Төрийн ордонд мэдээлэл хийлээ. 

УИХ-ын гишүүн С.Эрдэнболд: Өчигдөр УИХ-ын чуулганы танхимд УИХ-ын дарга Д.Амарбаясгалан "ард түмний амьдрал сайнгүй байгаа, шийдэх асуудлууд их байгаа" тухай хэлсэн. Бид үүнтэй санал нэг байгаа. 2020 онд талхны үнэ 1300 төгрөг байсан бол өнөөдөр 2640 төгрөг болж нэмэгдсэн байна. Гурил, төмс, луувангийн үнэ ч нэмэгдсэн. Шатахууны үнэ өнгөрсөн таван жилийн хугацаанд 40-61.3 хувиар өссөн. Өнөөдөр парламент энэ талаарх бодлогыг гаргаж, хэлэлцэх ёстой. Гэхдээ бодлого хэлэлцэх явцад парламент ёсныхоо дархлааг алдсаар байна. УИХ-ын дээрх мэдээллүүдийг асуухад Ерөнхий сайд эгдүүцсэн хариултыг өгсөн. Энэ бол ёс зүйн хувьд уучлалт гуйх ёстой асуудал гэдэг зарчмын байр суурийг АН гаргасан. Гэтэл хоёр хувь хүний хоорондын асуудал мэтээр тайлбарлаж байна. Парламент бол ардчиллын баталгаа. Гэтэл энэ зарчим руу нь нулимж, өөр хяналт тавиулах ёстой институцээс нь нэр бүхий гишүүд рүү халдаж байхад парламентын дарга парламент ёсныхоо дархлааг хамгаалахын оронд хувь хүмүүсийн хоорондын асуудал мэтээр тайлбарлаж байгаад харамсаж байна. Энэ бол захын ёс зүйн алдаа гэж харуулахаас илүүтэй засаглал хоорондын тэнцвэрийг алдагдуулсан байдал юм.

УИХ-ын гишүүн Б.Жаргалан: Ерөнхий сайдын хэлсэн үг парламентыг үл хүндэтгэсэн үйлдэл гэж үзсэн. Тиймээс Ерөнхий сайд уучлал гуйх ёстой. Паралментыг хүндэтгэх ёстой гэсэн байр суурин дээр хатуу байгаа. Тиймээс АН-ын бүлгээс УИХ-ын тухай хууль, УИХ-ын дэгийн тухай хуулиудад өөрчлөлт оруулахаар ажиллаж байна.