ТОМИЛОЛТ: Хавдрыг генийн түвшинд судалж, зөвхөн тухайн хүнд зориулсан эмчилгээ хийдэг Туркийн Медикана эмнэлэгт зочиллооТОМИЛОЛТ: Хавдрыг генийн түвшинд судалж, зөвхөн тухайн хүнд зориулсан эмчилгээ хийдэг Туркийн Медикана эмнэлэгт зочиллоо
Нийтэлсэн 2025 оны 4 сарын 28
Улс орнууд эрүүл мэндийн үйлчилгээндээ чанар, сүүлийн үеийн техник технологийг нэвтрүүлэхээс гадна тав тухтай орчин, өвчтөнийг таван одтой буудалд байгаа мэт эмнэлэгт эмчилж, сэтгэлзүйг нь ч давхар эмчилдэг болжээ.
Үүний нэг жишээ бол Турк улсын "Медикана" эмнэлэг юм. Тус эмнэлэг 1992 онд байгуулагдаж байсан бөгөөд өдгөө дотоод, гадаадын 17 салбартай болж, эмнэлгийн гуравдугаар шатлалын тусламж үйлчилгээг өөрийн улс орны иргэдэд үзүүлэхээс гадна дэлхийн өнцөг булан бүрээс зорин ирж үйлчлүүлдэг сая, сая үйлчлүүлэгчийн зорьж очдог газар болжээ. Тус эмнэлэг нь ойролцоогоор 16 мянган ажилтантай, 1400 нарийн мэргэжлийн эмч нараас гадна нийт 5000 орчим сувилагч, инженер техникийн ажилтантай аж.
Турк улс эрүүл мэндийн салбартаа ихээхэн хэмжээний хөрөнгө мөнгө зарцуулж, өнөөдөр эрүүл мэндийн салбар нь дэлхийд эхний тавд эрэмбэлэгдэх болтлоо хөгжжээ. Ийм хэмжээнд хүрэхийн тулд 50 жил зарцуулж, сүүлийн 30 гаруй жил төр нь эрүүл мэндийн салбартаа томоохон хөрөнгө оруулалт хийж иржээ. Үүний үр дүнд Турк улс анагаахын салбарт дэлхийд тэргүүлэгч улс болж чадсан байна.
Манай сурвалжлах баг Туркийн Станбул хотод байрлах "Медикана" эмнэлгийн хамгийн сүүлийн үеийн тоног төхөөрөмж, тав тухтай орчинтой хамгийн сүүлд нээсэн шинэхэн салбараар зочилсон юм. Тус салбар нь 220 хэвтэн эмчлүүлэх өрөөтэй бөгөөд дотроо дөрвөн төрөлтэй. Өвчтөнийхөө тав тухтай байдалд илүү анхаардаг учраас 10 мянга гаруй зочид буудлын үйлчилгээний ажилтантай гэдгийг танилцуулж байв. "Медикана" эрүүл мэндийн группийн удирдлагын зүгээс "Маш сайн эмнэлэг байгуулахын тулд дээр дурдсан ажлын байруудад ур чадвартай, мэргэшсэн хүмүүсийг ажиллуулах нь чухал" гэдгийг давхар онцолж байсан юм. Орчны хувьд өвдөөд ирсэн хүнийг тав тухтай орчинд байлгаж, эмчилгээ үйлчилгээ үзүүлж сэтгэл санааг нь ч тогтвортой байлгах тал дээр онцгой анхаардаг байна.
Сэтгүүлч Л.Одончимэг нь iToim.mn сайтын редактораар ажилладаг. 2016 оноос хойш улс төрийн чиглэлээр дагнан бичиж байгаа бөгөөд сэтгүүл зүйн салбарт 11 дэх жилдээ ажиллаж байна.
Энэ мэдээнд өгөх таны сэтгэгдэл ?
Эмчилгээний хувьд, Монголд гэлтгүй дэлхий дахины өмнө том асуудал болдог хавдрын өвчнийг эмчлэхдээ тухайн өвчтөний генийн түвшинд нь судлаад зөвхөн тэр хүнд зориулсан тусгай эмчилгээ гаргаж эмчилдэг байна. Тодруулбал, дэлхий нийтэд олон улсын стандартын дагуу химийн эмчилгээ юу хийх ёстой Батаа, Сараа, Чимэгээ гэж ялгахгүй нийтэд нь хийдэг бол MEDECANA эмнэлэг өвчтөн тус бүрийн генийг шинжилж, хавдар юунаас болж үүссэнийг тогтоож, түүнд тохирсон эмчилгээ хийдгээрээ хамгийн давуу талтай байна. Энэ эмчилгээний үр дүн энгийн эмчилгээгээс 20 дахин өндөр үр дүн үзүүлж байгааг тус эмнэлгийн эмч хэлсэн юм.
"Медикана" эмнэлэг өнөөдрийн байдлаар Англид салбараа нээсэн бөгөөд Босни улсад салбараа нээхээр бэлтгэл ажилдаа орсон байна. Тун удахгүй Герман, Румень улсад салбараа нээхээр төлөвлөж байгаа аж.
Медикана эмнэлэгт дэлхийн өнцөг булан бүрээс өвчтөнүүд ирж үзүүлж, эмчлүүлдэг бөгөөд монголчуудад хамгийн хямд үнийг санал болгодог байна. Ямар ч өвчтөн сахиуртайгаа ирэх боломжтой бөгөөд өглөө, өдөр, оройн хоолоор үнэ төлбөргүй үйлчилдэг байна. Энэ нь өрөөний төлбөр эмчилгээний үнэдээ багтсан байдаг гэнэ. Хүмүүсийг эмнэлэгт хэвтэж байна гэхээс илүү таван одтой зочид буудалд амраад биеэ эмчлүүлээд явах сэтгэгдэл төрүүлэхийн тулд олон улсын зочид буудлын шаардлагыг бүрэн хангажээ.
Түүнчлэн Монгол Улсад салбараа нээх саналаа Эрүүл мэндийн сайд Т.Мөнхсайханд тавьсан байна. Гэхдээ салбараа нээхийн тулд багадаа таван жилийн хугацаа шаардлагатай байдаг бөгөөд энэ хугацаанд бүхий л бэлтгэл ажлыг хангаж дуусдаг байна. Хэрвээ MEDECANA эмнэлэг манай улсад салбараа нээвэл Монголд эмчлэгдэх боломжгүй 22 төрлийн өвчнийг тус эмнэлгийн салбар эмчлэх бүрэн боломжтой болох юм. Харин салбараа нээхийн тулд тухайн улсын төрийн дэмжлэг маш чухал гэдгийг тус эмнэлгийн ТУЗ-ийн дарга "Медикана" эмнэлгийн ТУЗ-ийн дарга Реха Өзкая хэлсэн юм.
Реха Өзкая: Эрүүл мэндийн салбараа хөгжүүлэхийн тулд хувийн даатгалын системээ хөгжүүлэх хэрэгтэй
Тэрээр "Өөр улсад эмнэлгээ нээж, хөрөнгө оруулахын тулд тухайн улсын төр засгийн дэмжлэг шаардлагатай. Нэгд, Турк улсад бол хувийн эмнэлэгт очсон ч ямар өвчин гэдгээсээ шалтгаалаад 100 хувь улсын даатгал нь төлдөг. Тиймээс Монгол Улсад улсын даатгал нь хэдэн хувь үйлчлэх, өвчтөнүүд хэдэн хувийг төлөх боломжтой вэ гэх мэт маш олон асуудлыг шийдэх ёстой. Эрүүл мэндийн сайд Т.Мөнхсайхан манай эмнэлгийнхнийг Монгол Улсад урьсан. Бид зун очих төлөвлөгөөтэй байгаа. Энэ уулзалтаар эмнэлэг нээх талаар нарийвчлан ярилцаад, тухайн үедээ шийднэ гэж найдаж байна.
Ихэнх улс гаднаас хөрөнгө оруулалт татахын тулд таатай нөхцөл санал болгодог. Тухайлбал, эмнэлэг барих газар олгох, эмнэлэг тэр чигээрээ бэлэн байна, та бүхэн эмчээ аваад ир гэдэг ч юм уу. Орон бүхэн таатай нөхцөл санал болгодог. Монгол дахь хөрөнгө оруулалтыг хийхийн тулд Монгол талаас бас том хөрөнгө оруулагч байхыг хүсэж байгаа. Үүний дагуу ажил хэргүүд явагдаж байгаа. Эмнэлэг нээхэд хамгийн амархан нь барилга барих. Барилга байлаа гэхэд ажилтнуудын ур чадвар хамгийн чухал. Хүний нөөцийн ур чадвар "Медикана" эмнэлгийг илтгэх учраас энэ хамгийн чухал.
Эмнэлэг нээхэд үйл явцыг хамгийн хурдлуулдаг зүйл бол тухайн улсын төрийн дэмжлэг. Бид Монгол Улсаас эдийн засаг, хөрөнгө оруулалтын ямар нэгэн дэмжлэг хүсээгүй. Зөвхөн төрөөс хамааралтай зөвшөөрөл авах ч гэдэг юм уу асуудлууд дээр дэмжээд өгвөл бид эмнэлэг нээх ажлаа хурдлуулах бүрэн боломжтой. Хавдар туссан монгол иргэд хандив цуглуулаад гаднын орон очиж эмчилгээ үйлчилгээ авдгаас харвал их мөнгө гадагшаа урсаж байна гэсэн үг. Үүнийг бид Монголд үлдээхийн тулд Монголд салбараа нээх санал гаргаж байгаа юм.
Мөн аливаа улс орон эрүүл мэндийн салбар хөгжихөд хувийн даатгал маш том нөлөө үзүүлдэг. Монголд хөгжих ёстой гол зүйлийн нэг бол хувийн даатгал. Мөн төрийн эрүүл мэндийн үйлчилгээ иргэддээ хүрч чадаж байвал эрүүл мэндийн салбар маш сайн хөгждөг" гэлээ.
Мутлу Демирай: Өвчтөн бүрд зориулсан хавдрын эмчилгээ хийх нь 20 дахин өндөр үр дүнтэй
"Медикана" эмнэлгийн Хавдрын профессор эмч Мутлу Демирай өвчтөн бүрд зориулсан хавдрын эмчилгээ хийдэг талаараа “Бусад улс оронд хавдрын эмчилгээ ижил стандарттай байдаг. Хавдраар өвдсөн хүн ямар хүн байна гэдгээс үл шалтгаалан ямар эрхтэн нь хавдартай болсон байна түүнд нь зориулсан эмчилгээ хийдэг. Тухайлбал, уушгины хавдартай хүнд эрэгтэй эмэгтэй, турк, монгол, америк хүн байна уу гэдгээс үл шалтгаалан адилхан эмчилгээ хийгддэг.
Харин манай эмнэлэг тухайн хүний генетикийн түвшинд судлаад онцлогт нь тохирсон эмчилгээг гаргаж авдаг. Өвчтөний хавдраас эдийн шинжилгээ аваад маш нарийн шинжилгээ хийж, хавдар хэзээ яаж үүссэн байна, цаашаа хэрхэн томорсон гэх мэт бүхий л мэдээллийг гаргаж аваад тухайн хүнд зориулсан эмчилгээг нь баталдаг.
Манай эмнэлэгт хавдрын эмчилгээний дөрөв, хавдрын генетгийн судлаач зургаан эмч ажилладаг. Хавдартай хүний генийн хариуг эдгээр эмч нартайгаа хурал хийж, тухайн өвчтөний хавдар молекулын түвшинд юу байна вэ гэдгийг ярилцаж, тухайн хүнд зориулсан эмчилгээг гаргадаг. Үр дүнгийн хувьд бахархалтайгаар хэлэхэд 20 дахин илүү амжилттай байгаа” хэмээн ярьсан юм.
Хамгийн сүүлд байгуулагдсан шинэ салбар эмнэлэг нь химийн эмчилгээний 28 өрөөтэй. Хэвтэх болон сууж химийн эмчилгээ хийх сонголттой бөгөөд суух хэсэг нь ухаалаг төхөөрөмж, массажны сандалтай. Мөн тухайн эмнэлэгт ямар нэгэн өндөр үнэтэй эм зардаггүй аж. Эмчилгээ хийж байх явцдаа эмээ хийж, үйлдвэрлэдэг талаар эмнэлгийнхэн хэлж байв. Эмнэлэг болгон өөрсдөө түүхий эдээ авч, тухайн өвчтөндөө зориулж эмээ үйлдвэрлэдэг. "Медикана" эмнэлгийн тасаг бүр бүрэн цогц нэг эмнэлгийн хэмжээнд ажилладаг гэж хэлж болно. Тус эмнэлэгт өдөрт 2000 хагалгаа хийдэг бөгөөд 50-60 хувийг нь роботоор хийдэг байна. Робот хагалгааны үр дүн нь нээлттэй хагалгаа хийсэнтэй ижил үр дүнтэй байдаг аж.
