ЗГХЭГ-ын дарга Н.Учрал "Төгрөг нуурын орд"-той холбоотой хэргийн баримт материалуудыг хуулийн байгууллагуудад хүргүүлсэн тухайгаа мэдэгдсэн билээ. Тэрээр "Монголын баялаг аль нэгэн намын өмч, аль нэгэн улстөрчийн хувийн хөрөнгө хэрхэвч биш. Аль намын, хэн эзэмшсэн байх нь энд огт хамаагүй. Тиймээс хуулийн дагуу авах ёстой нуураа ч, худгаа ч, овоо, овоолгоо ч авна" гэж хэлж байсан. Уг хэрэгтэй холбоотой асуудлын талаар өнөөдөр /2025.04.24-нд/ гурван байгууллагаас бүрдсэн ажлын хэсэг мэдээллээ.

Ажлын хэсгийн төлөөлөл: Энэ оны дөрөвдүгээр сарын 11-ний өдөр Монгол Улсын Засгийн газрын Хэрэг эрхлэх газраас гэмт хэргийн талаарх мэдээллийг ирүүлсэн. Уг мэдээллийг Авлигатай тэмцэх газар болон Ерөнхий прокурорын газарт ирүүлсний дагуу 2025 оны дөрөвдүгээр сарын 17-ны өдөр Авлигатай тэмцэх газрын мөрдөн шалгах хэлтсээс мөрдөгчийн тогтоолын дагуу хэрэг бүртгэлтийн хэрэг нээхээр ирүүлсэн. Уг тогтоолын дагуу Нийслэлийн прокурорын газраас хүлээн авч хянаад Эрүүгийн хуулийн тусгай ангийн 22.1 Эрх мэдэл албан тушаалаа урвуулан ашигласан байж болзошгүй. Мөн 22.10 заасан Үндэслэлгүйгээр хөрөнгөжсөн байж болзошгүй гэх асуудлаар хэрэг бүртгэлтийн хэрэг нээн мөрдөн шалгах ажиллагааг явуулж байна. Тус хэлтэс дээр хамтарсан ажлын хэсэг байгуулагдаж, мөрдөн шалгах ажиллагааг явуулан шалгаж байгаа.

Авлигатай тэмцэх газрын мөрдөн шалгах хэлтсээс хамтарсан ажлын хэсэг байгуулах саналыг прокурорын байгууллагад ирүүлсэн. Уг саналыг үндэслэн Улсын ерөнхий прокурорын газар хэрэг бүртгэн мөрдөн байцаах ажиллагаанд хяналт тавих хэлтсийн даргын тогтоолын дагуу Цагдаагийн байгууллага болон Авлигатай тэмцэх газрын хамтарсан ажлын хэсгийг байгуулан мөрдөн шалгах ажиллагааг үргэлжлүүлж байна.